איוב

א,א אִישׁ הָיָה בְאֶרֶץ עוּץ, אִיּוֹב שְׁמוֹ; וְהָיָה הָאִישׁ הַהוּא, תָּם וְיָשָׁר וִירֵא אֱלֹהִים--וְסָר מֵרָע.  א,ב וַיִּוָּלְדוּ לוֹ שִׁבְעָה בָנִים, וְשָׁלוֹשׁ בָּנוֹת.  א,ג וַיְהִי מִקְנֵהוּ שִׁבְעַת אַלְפֵי צֹאן וּשְׁלֹשֶׁת אַלְפֵי גְמַלִּים, וַחֲמֵשׁ מֵאוֹת צֶמֶד בָּקָר וַחֲמֵשׁ מֵאוֹת אֲתוֹנוֹת, וַעֲבֻדָּה, רַבָּה מְאֹד; וַיְהִי הָאִישׁ הַהוּא, גָּדוֹל מִכָּל בְּנֵי קֶדֶם.  א,ד וְהָלְכוּ בָנָיו וְעָשׂוּ מִשְׁתֶּה, בֵּית אִישׁ יוֹמוֹ; וְשָׁלְחוּ, וְקָרְאוּ לִשְׁלֹשֶׁת אַחְיֹתֵיהֶם, לֶאֱכֹל וְלִשְׁתּוֹת, עִמָּהֶם.  א,ה וַיְהִי כִּי הִקִּיפוּ יְמֵי הַמִּשְׁתֶּה וַיִּשְׁלַח אִיּוֹב וַיְקַדְּשֵׁם, וְהִשְׁכִּים בַּבֹּקֶר וְהֶעֱלָה עֹלוֹת מִסְפַּר כֻּלָּם--כִּי אָמַר אִיּוֹב, אוּלַי חָטְאוּ בָנַי וּבֵרְכוּ אֱלֹהִים בִּלְבָבָם:  כָּכָה יַעֲשֶׂה אִיּוֹב, כָּל הַיָּמִים.  {פ}

א,ו וַיְהִי הַיּוֹם--וַיָּבֹאוּ בְּנֵי הָאֱלֹהִים, לְהִתְיַצֵּב עַל יְהוָה; וַיָּבוֹא גַם הַשָּׂטָן, בְּתוֹכָם.  א,ז וַיֹּאמֶר יְהוָה אֶל הַשָּׂטָן, מֵאַיִן תָּבֹא; וַיַּעַן הַשָּׂטָן אֶת יְהוָה, וַיֹּאמַר, מִשּׁוּט בָּאָרֶץ, וּמֵהִתְהַלֵּךְ בָּהּ.  א,ח וַיֹּאמֶר יְהוָה אֶל הַשָּׂטָן, הֲשַׂמְתָּ לִבְּךָ עַל עַבְדִּי אִיּוֹב:  כִּי אֵין כָּמֹהוּ בָּאָרֶץ, אִישׁ תָּם וְיָשָׁר יְרֵא אֱלֹהִים וְסָר מֵרָע.  א,ט וַיַּעַן הַשָּׂטָן אֶת יְהוָה, וַיֹּאמַר:  הַחִנָּם, יָרֵא אִיּוֹב אֱלֹהִים.  א,י הֲלֹא את (אַתָּה) שַׂכְתָּ בַעֲדוֹ וּבְעַד בֵּיתוֹ, וּבְעַד כָּל אֲשֶׁר לוֹ--מִסָּבִיב:  מַעֲשֵׂה יָדָיו בֵּרַכְתָּ, וּמִקְנֵהוּ פָּרַץ בָּאָרֶץ.  א,יא וְאוּלָם שְׁלַח נָא יָדְךָ, וְגַע בְּכָל אֲשֶׁר לוֹ--אִם לֹא עַל פָּנֶיךָ, יְבָרְכֶךָּ.  א,יב וַיֹּאמֶר יְהוָה אֶל הַשָּׂטָן, הִנֵּה כָל אֲשֶׁר לוֹ בְּיָדֶךָ--רַק אֵלָיו, אַל תִּשְׁלַח יָדֶךָ; וַיֵּצֵא, הַשָּׂטָן, מֵעִם, פְּנֵי יְהוָה.  א,יג וַיְהִי, הַיּוֹם; וּבָנָיו וּבְנֹתָיו אֹכְלִים וְשֹׁתִים יַיִן, בְּבֵית אֲחִיהֶם הַבְּכוֹר.  א,יד וּמַלְאָךְ בָּא אֶל אִיּוֹב, וַיֹּאמַר:  הַבָּקָר הָיוּ חֹרְשׁוֹת, וְהָאֲתֹנוֹת רֹעוֹת עַל יְדֵיהֶם.  א,טו וַתִּפֹּל שְׁבָא וַתִּקָּחֵם, וְאֶת הַנְּעָרִים הִכּוּ לְפִי חָרֶב; וָאִמָּלְטָה רַק אֲנִי לְבַדִּי, לְהַגִּיד לָךְ.  א,טז עוֹד זֶה מְדַבֵּר, וְזֶה בָּא וַיֹּאמַר, אֵשׁ אֱלֹהִים נָפְלָה מִן הַשָּׁמַיִם, וַתִּבְעַר בַּצֹּאן וּבַנְּעָרִים וַתֹּאכְלֵם; וָאִמָּלְטָה רַק אֲנִי לְבַדִּי, לְהַגִּיד לָךְ.  א,יז עוֹד זֶה מְדַבֵּר, וְזֶה בָּא וַיֹּאמַר, כַּשְׂדִּים שָׂמוּ שְׁלֹשָׁה רָאשִׁים וַיִּפְשְׁטוּ עַל הַגְּמַלִּים וַיִּקָּחוּם, וְאֶת הַנְּעָרִים הִכּוּ לְפִי חָרֶב; וָאִמָּלְטָה רַק אֲנִי לְבַדִּי, לְהַגִּיד לָךְ.  א,יח עַד זֶה מְדַבֵּר, וְזֶה בָּא וַיֹּאמַר:  בָּנֶיךָ וּבְנוֹתֶיךָ אֹכְלִים וְשֹׁתִים יַיִן, בְּבֵית אֲחִיהֶם הַבְּכוֹר.  א,יט וְהִנֵּה רוּחַ גְּדוֹלָה בָּאָה מֵעֵבֶר הַמִּדְבָּר, וַיִּגַּע בְּאַרְבַּע פִּנּוֹת הַבַּיִת, וַיִּפֹּל עַל הַנְּעָרִים, וַיָּמוּתוּ; וָאִמָּלְטָה רַק אֲנִי לְבַדִּי, לְהַגִּיד לָךְ.  א,כ וַיָּקָם אִיּוֹב וַיִּקְרַע אֶת מְעִלוֹ, וַיָּגָז אֶת רֹאשׁוֹ; וַיִּפֹּל אַרְצָה, וַיִּשְׁתָּחוּ.  א,כא וַיֹּאמֶר עָרֹם יָצָתִי מִבֶּטֶן אִמִּי, וְעָרֹם אָשׁוּב שָׁמָּה--יְהוָה נָתַן, וַיהוָה לָקָח; יְהִי שֵׁם יְהוָה, מְבֹרָךְ.  א,כב בְּכָל זֹאת, לֹא חָטָא אִיּוֹב; וְלֹא נָתַן תִּפְלָה, לֵאלֹהִים.  {פ}

ב,א וַיְהִי הַיּוֹם--וַיָּבֹאוּ בְּנֵי הָאֱלֹהִים, לְהִתְיַצֵּב עַל יְהוָה; וַיָּבוֹא גַם הַשָּׂטָן בְּתֹכָם, לְהִתְיַצֵּב עַל יְהוָה.  ב,ב וַיֹּאמֶר יְהוָה אֶל הַשָּׂטָן, אֵי מִזֶּה תָּבֹא; וַיַּעַן הַשָּׂטָן אֶת יְהוָה, וַיֹּאמַר, מִשֻּׁט בָּאָרֶץ, וּמֵהִתְהַלֵּךְ בָּהּ.  ב,ג וַיֹּאמֶר יְהוָה אֶל הַשָּׂטָן, הֲשַׂמְתָּ לִבְּךָ אֶל עַבְדִּי אִיּוֹב--כִּי אֵין כָּמֹהוּ בָּאָרֶץ אִישׁ תָּם וְיָשָׁר יְרֵא אֱלֹהִים, וְסָר מֵרָע; וְעֹדֶנּוּ מַחֲזִיק בְּתֻמָּתוֹ, וַתְּסִיתֵנִי בוֹ לְבַלְּעוֹ חִנָּם.  ב,ד וַיַּעַן הַשָּׂטָן אֶת יְהוָה, וַיֹּאמַר:  עוֹר בְּעַד עוֹר, וְכֹל אֲשֶׁר לָאִישׁ--יִתֵּן, בְּעַד נַפְשׁוֹ.  ב,ה אוּלָם שְׁלַח נָא יָדְךָ, וְגַע אֶל עַצְמוֹ וְאֶל בְּשָׂרוֹ--אִם לֹא אֶל פָּנֶיךָ, יְבָרְכֶךָּ.  ב,ו וַיֹּאמֶר יְהוָה אֶל הַשָּׂטָן, הִנּוֹ בְיָדֶךָ:  אַךְ, אֶת נַפְשׁוֹ שְׁמֹר.  ב,ז וַיֵּצֵא, הַשָּׂטָן, מֵאֵת, פְּנֵי יְהוָה; וַיַּךְ אֶת אִיּוֹב בִּשְׁחִין רָע, מִכַּף רַגְלוֹ עד (וְעַד) קָדְקֳדוֹ.  ב,ח וַיִּקַּח לוֹ חֶרֶשׂ, לְהִתְגָּרֵד בּוֹ; וְהוּא, יֹשֵׁב בְּתוֹךְ הָאֵפֶר.  ב,ט וַתֹּאמֶר לוֹ אִשְׁתּוֹ, עֹדְךָ מַחֲזִיק בְּתֻמָּתֶךָ; בָּרֵךְ אֱלֹהִים, וָמֻת.  ב,י וַיֹּאמֶר אֵלֶיהָ, כְּדַבֵּר אַחַת הַנְּבָלוֹת תְּדַבֵּרִי--גַּם אֶת הַטּוֹב נְקַבֵּל מֵאֵת הָאֱלֹהִים, וְאֶת הָרָע לֹא נְקַבֵּל; בְּכָל זֹאת לֹא חָטָא אִיּוֹב, בִּשְׂפָתָיו.  {פ}

ב,יא וַיִּשְׁמְעוּ שְׁלֹשֶׁת רֵעֵי אִיּוֹב, אֵת כָּל הָרָעָה הַזֹּאת הַבָּאָה עָלָיו, וַיָּבֹאוּ אִישׁ מִמְּקֹמוֹ, אֱלִיפַז הַתֵּימָנִי וּבִלְדַּד הַשּׁוּחִי וְצוֹפַר הַנַּעֲמָתִי; וַיִּוָּעֲדוּ יַחְדָּו, לָבוֹא לָנוּד לוֹ וּלְנַחֲמוֹ.  ב,יב וַיִּשְׂאוּ אֶת עֵינֵיהֶם מֵרָחוֹק וְלֹא הִכִּירֻהוּ, וַיִּשְׂאוּ קוֹלָם וַיִּבְכּוּ; וַיִּקְרְעוּ אִישׁ מְעִלוֹ, וַיִּזְרְקוּ עָפָר עַל רָאשֵׁיהֶם הַשָּׁמָיְמָה.  ב,יג וַיֵּשְׁבוּ אִתּוֹ לָאָרֶץ, שִׁבְעַת יָמִים וְשִׁבְעַת לֵילוֹת; וְאֵין דֹּבֵר אֵלָיו, דָּבָר--כִּי רָאוּ, כִּי גָדַל הַכְּאֵב מְאֹד.  ג,א אַחֲרֵי כֵן, פָּתַח אִיּוֹב אֶת פִּיהוּ, וַיְקַלֵּל, אֶת יוֹמוֹ.  {פ}

ג,ב                  וַיַּעַן אִיּוֹב, וַיֹּאמַר.
ג,ג  יֹאבַד יוֹם, אִוָּלֶד בּוֹ;    וְהַלַּיְלָה אָמַר, הֹרָה גָבֶר.
ג,ד  הַיּוֹם הַהוּא,    יְהִי-חֹשֶׁךְ:
אַל-יִדְרְשֵׁהוּ אֱלוֹהַּ מִמַּעַל;    וְאַל-תּוֹפַע עָלָיו נְהָרָה.
ג,ה  יִגְאָלֻהוּ, חֹשֶׁךְ וְצַלְמָוֶת--תִּשְׁכָּן-עָלָיו עֲנָנָה;    יְבַעֲתֻהוּ, כִּמְרִירֵי יוֹם.
ג,ו  הַלַּיְלָה הַהוּא,    יִקָּחֵהוּ-אֹפֶל:
אַל-יִחַדְּ, בִּימֵי שָׁנָה;    בְּמִסְפַּר יְרָחִים, אַל-יָבֹא.
ג,ז  הִנֵּה הַלַּיְלָה הַהוּא, יְהִי גַלְמוּד;    אַל-תָּבוֹא רְנָנָה בוֹ.
ג,ח  יִקְּבֻהוּ אֹרְרֵי-יוֹם;    הָעֲתִידִים, עֹרֵר לִוְיָתָן.
ג,ט  יֶחְשְׁכוּ, כּוֹכְבֵי נִשְׁפּוֹ:    יְקַו-לְאוֹר וָאַיִן; וְאַל-יִרְאֶה, בְּעַפְעַפֵּי-שָׁחַר.
ג,י  כִּי לֹא סָגַר, דַּלְתֵי בִטְנִי;    וַיַּסְתֵּר עָמָל, מֵעֵינָי.
ג,יא  לָמָּה לֹּא מֵרֶחֶם אָמוּת;    מִבֶּטֶן יָצָאתִי וְאֶגְוָע.
ג,יב  מַדּוּעַ, קִדְּמוּנִי בִרְכָּיִם;    וּמַה-שָּׁדַיִם, כִּי אִינָק.
ג,יג  כִּי-עַתָּה, שָׁכַבְתִּי וְאֶשְׁקוֹט;    יָשַׁנְתִּי, אָז יָנוּחַ לִי.
ג,יד  עִם-מְלָכִים, וְיֹעֲצֵי אָרֶץ;    הַבֹּנִים חֳרָבוֹת לָמוֹ.
ג,טו  אוֹ עִם-שָׂרִים, זָהָב לָהֶם;    הַמְמַלְאִים בָּתֵּיהֶם כָּסֶף.
ג,טז  אוֹ כְנֵפֶל טָמוּן, לֹא אֶהְיֶה;    כְּעֹלְלִים, לֹא-רָאוּ אוֹר.
ג,יז  שָׁם רְשָׁעִים, חָדְלוּ רֹגֶז;    וְשָׁם יָנוּחוּ, יְגִיעֵי כֹחַ.
ג,יח  יַחַד, אֲסִירִים שַׁאֲנָנוּ;    לֹא שָׁמְעוּ, קוֹל נֹגֵשׂ.
ג,יט  קָטֹן וְגָדוֹל, שָׁם הוּא;    וְעֶבֶד, חָפְשִׁי מֵאֲדֹנָיו.
ג,כ  לָמָּה יִתֵּן לְעָמֵל אוֹר;    וְחַיִּים, לְמָרֵי נָפֶשׁ.
ג,כא  הַמְחַכִּים לַמָּוֶת וְאֵינֶנּוּ;    וַיַּחְפְּרֻהוּ, מִמַּטְמוֹנִים.
ג,כב  הַשְּׂמֵחִים אֱלֵי-גִיל--    יָשִׂישׂוּ, כִּי יִמְצְאוּ-קָבֶר.
ג,כג  לְגֶבֶר, אֲשֶׁר-דַּרְכּוֹ נִסְתָּרָה;    וַיָּסֶךְ אֱלוֹהַּ בַּעֲדוֹ.
ג,כד  כִּי-לִפְנֵי לַחְמִי, אַנְחָתִי תָבֹא;    וַיִּתְּכוּ כַמַּיִם, שַׁאֲגֹתָי.
ג,כה  כִּי פַחַד פָּחַדְתִּי, וַיֶּאֱתָיֵנִי;    וַאֲשֶׁר יָגֹרְתִּי, יָבֹא לִי.
ג,כו  לֹא שָׁלַוְתִּי, וְלֹא שָׁקַטְתִּי וְלֹא-נָחְתִּי;    וַיָּבֹא רֹגֶז.
ד,א                  וַיַּעַן, אֱלִיפַז הַתֵּימָנִי; וַיֹּאמַר.
ד,ב  הֲנִסָּה דָבָר אֵלֶיךָ תִּלְאֶה;    וַעְצֹר בְּמִלִּין, מִי יוּכָל.
ד,ג  הִנֵּה, יִסַּרְתָּ רַבִּים;    וְיָדַיִם רָפוֹת תְּחַזֵּק.
ד,ד  כּוֹשֵׁל, יְקִימוּן מִלֶּיךָ;    וּבִרְכַּיִם כֹּרְעוֹת תְּאַמֵּץ.
ד,ה  כִּי עַתָּה, תָּבוֹא אֵלֶיךָ וַתֵּלֶא;    תִּגַּע עָדֶיךָ, וַתִּבָּהֵל.
ד,ו  הֲלֹא יִרְאָתְךָ, כִּסְלָתֶךָ;    תִּקְוָתְךָ, וְתֹם דְּרָכֶיךָ.
ד,ז  זְכָר-נָא--מִי הוּא נָקִי אָבָד;    וְאֵיפֹה, יְשָׁרִים נִכְחָדוּ.
ד,ח  כַּאֲשֶׁר רָאִיתִי, חֹרְשֵׁי אָוֶן;    וְזֹרְעֵי עָמָל יִקְצְרֻהוּ.
ד,ט  מִנִּשְׁמַת אֱלוֹהַּ יֹאבֵדוּ;    וּמֵרוּחַ אַפּוֹ יִכְלוּ.
ד,י  שַׁאֲגַת אַרְיֵה, וְקוֹל שָׁחַל;    וְשִׁנֵּי כְפִירִים נִתָּעוּ.
ד,יא  לַיִשׁ, אֹבֵד מִבְּלִי-טָרֶף;    וּבְנֵי לָבִיא, יִתְפָּרָדוּ.
ד,יב  וְאֵלַי, דָּבָר יְגֻנָּב;    וַתִּקַּח אָזְנִי, שֵׁמֶץ מֶנְהוּ.
ד,יג  בִּשְׂעִפִּים, מֵחֶזְיֹנוֹת לָיְלָה;    בִּנְפֹל תַּרְדֵּמָה, עַל-אֲנָשִׁים.
ד,יד  פַּחַד קְרָאַנִי, וּרְעָדָה;    וְרֹב עַצְמוֹתַי הִפְחִיד.
ד,טו  וְרוּחַ, עַל-פָּנַי יַחֲלֹף;    תְּסַמֵּר, שַׂעֲרַת בְּשָׂרִי.
ד,טז  יַעֲמֹד, וְלֹא אַכִּיר מַרְאֵהוּ--    תְּמוּנָה, לְנֶגֶד עֵינָי;
דְּמָמָה וָקוֹל    אֶשְׁמָע.
ד,יז  הַאֱנוֹשׁ, מֵאֱלוֹהַּ יִצְדָּק;    אִם מֵעֹשֵׂהוּ, יִטְהַר-גָּבֶר.
ד,יח  הֵן בַּעֲבָדָיו, לֹא יַאֲמִין;    וּבְמַלְאָכָיו, יָשִׂים תָּהֳלָה.
ד,יט  אַף, שֹׁכְנֵי בָתֵּי-חֹמֶר--אֲשֶׁר-בֶּעָפָר יְסוֹדָם:    יְדַכְּאוּם, לִפְנֵי-עָשׁ.
ד,כ  מִבֹּקֶר לָעֶרֶב יֻכַּתּוּ;    מִבְּלִי מֵשִׂים, לָנֶצַח יֹאבֵדוּ.
ד,כא  הֲלֹא-נִסַּע יִתְרָם בָּם;    יָמוּתוּ, וְלֹא בְחָכְמָה.
ה,א  קְרָא-נָא, הֲיֵשׁ עוֹנֶךָּ;    וְאֶל-מִי מִקְּדֹשִׁים תִּפְנֶה.
ה,ב  כִּי-לֶאֱוִיל, יַהֲרָג-כָּעַשׂ;    וּפֹתֶה, תָּמִית קִנְאָה.
ה,ג  אֲנִי-רָאִיתִי, אֱוִיל מַשְׁרִישׁ;    וָאֶקּוֹב נָוֵהוּ פִתְאֹם.
ה,ד  יִרְחֲקוּ בָנָיו מִיֶּשַׁע;    וְיִדַּכְּאוּ בַשַּׁעַר, וְאֵין מַצִּיל.
ה,ה  אֲשֶׁר קְצִירוֹ, רָעֵב יֹאכֵל--וְאֶל-מִצִּנִּים יִקָּחֵהוּ;    וְשָׁאַף צַמִּים חֵילָם.
ה,ו  כִּי, לֹא-יֵצֵא מֵעָפָר אָוֶן;    וּמֵאֲדָמָה, לֹא-יִצְמַח עָמָל.
ה,ז  כִּי-אָדָם, לְעָמָל יוּלָּד;    וּבְנֵי-רֶשֶׁף, יַגְבִּיהוּ עוּף.
ה,ח  אוּלָם--אֲנִי, אֶדְרֹשׁ אֶל-אֵל;    וְאֶל-אֱלֹהִים, אָשִׂים דִּבְרָתִי.
ה,ט  עֹשֶׂה גְדֹלוֹת, וְאֵין חֵקֶר;    נִפְלָאוֹת, עַד-אֵין מִסְפָּר.
ה,י  הַנֹּתֵן מָטָר, עַל-פְּנֵי-אָרֶץ;    וְשֹׁלֵחַ מַיִם, עַל-פְּנֵי חוּצוֹת.
ה,יא  לָשׂוּם שְׁפָלִים לְמָרוֹם;    וְקֹדְרִים, שָׂגְבוּ יֶשַׁע.
ה,יב  מֵפֵר, מַחְשְׁבוֹת עֲרוּמִים;    וְלֹא-תַעֲשֶׂנָה יְדֵיהֶם, תֻּשִׁיָּה.
ה,יג  לֹכֵד חֲכָמִים בְּעָרְמָם;    וַעֲצַת נִפְתָּלִים נִמְהָרָה.
ה,יד  יוֹמָם יְפַגְּשׁוּ-חֹשֶׁךְ;    וְכַלַּיְלָה, יְמַשְׁשׁוּ בַצָּהֳרָיִם.
ה,טו  וַיֹּשַׁע מֵחֶרֶב, מִפִּיהֶם;    וּמִיַּד חָזָק אֶבְיוֹן.
ה,טז  וַתְּהִי לַדַּל תִּקְוָה;    וְעֹלָתָה, קָפְצָה פִּיהָ.
ה,יז  הִנֵּה אַשְׁרֵי אֱנוֹשׁ, יוֹכִחֶנּוּ אֱלוֹהַּ;    וּמוּסַר שַׁדַּי, אַל-תִּמְאָס.
ה,יח  כִּי הוּא יַכְאִיב וְיֶחְבָּשׁ;    יִמְחַץ, וְיָדָו תִּרְפֶּינָה.
ה,יט  בְּשֵׁשׁ צָרוֹת, יַצִּילֶךָּ;    וּבְשֶׁבַע, לֹא-יִגַּע בְּךָ רָע.
ה,כ  בְּרָעָב, פָּדְךָ מִמָּוֶת;    וּבְמִלְחָמָה, מִידֵי חָרֶב.
ה,כא  בְּשׁוֹט לָשׁוֹן, תֵּחָבֵא;    וְלֹא-תִירָא מִשֹּׁד, כִּי יָבוֹא.
ה,כב  לְשֹׁד וּלְכָפָן תִּשְׂחָק;    וּמֵחַיַּת הָאָרֶץ, אַל-תִּירָא.
ה,כג  כִּי עִם-אַבְנֵי הַשָּׂדֶה בְרִיתֶךָ;    וְחַיַּת הַשָּׂדֶה, הָשְׁלְמָה-לָּךְ.
ה,כד  וְיָדַעְתָּ, כִּי-שָׁלוֹם אָהֳלֶךָ;    וּפָקַדְתָּ נָוְךָ, וְלֹא תֶחֱטָא.
ה,כה  וְיָדַעְתָּ, כִּי-רַב זַרְעֶךָ;    וְצֶאֱצָאֶיךָ, כְּעֵשֶׂב הָאָרֶץ.
ה,כו  תָּבוֹא בְכֶלַח אֱלֵי-קָבֶר;    כַּעֲלוֹת גָּדִישׁ בְּעִתּוֹ.
ה,כז  הִנֵּה-זֹאת חֲקַרְנוּהָ כֶּן-הִיא;    שְׁמָעֶנָּה, וְאַתָּה דַע-לָךְ.
ו,א                  וַיַּעַן אִיּוֹב, וַיֹּאמַר.
ו,ב  לוּ--שָׁקוֹל יִשָּׁקֵל כַּעְשִׂי;    והיתי (וְהַוָּתִי), בְּמֹאזְנַיִם יִשְׂאוּ-יָחַד.
ו,ג  כִּי-עַתָּה--מֵחוֹל יַמִּים יִכְבָּד;    עַל-כֵּן, דְּבָרַי לָעוּ.
ו,ד  כִּי חִצֵּי שַׁדַּי, עִמָּדִי--אֲשֶׁר חֲמָתָם, שֹׁתָה רוּחִי;    בִּעוּתֵי אֱלוֹהַּ יַעַרְכוּנִי.
ו,ה  הֲיִנְהַק-פֶּרֶא עֲלֵי-דֶשֶׁא;    אִם יִגְעֶה-שּׁוֹר, עַל-בְּלִילוֹ.
ו,ו  הֲיֵאָכֵל תָּפֵל, מִבְּלִי-מֶלַח;    אִם-יֶשׁ-טַעַם, בְּרִיר חַלָּמוּת.
ו,ז  מֵאֲנָה לִנְגּוֹעַ נַפְשִׁי;    הֵמָּה, כִּדְוֵי לַחְמִי.
ו,ח  מִי-יִתֵּן, תָּבוֹא שֶׁאֱלָתִי;    וְתִקְוָתִי, יִתֵּן אֱלוֹהַּ.
ו,ט  וְיֹאֵל אֱלוֹהַּ, וִידַכְּאֵנִי;    יַתֵּר יָדוֹ, וִיבַצְּעֵנִי.
ו,י  וּתְהִי-עוֹד, נֶחָמָתִי--    וַאֲסַלְּדָה בְחִילָה, לֹא יַחְמוֹל:
כִּי-לֹא כִחַדְתִּי,    אִמְרֵי קָדוֹשׁ.
ו,יא  מַה-כֹּחִי כִי-אֲיַחֵל;    וּמַה-קִּצִּי, כִּי-אַאֲרִיךְ נַפְשִׁי.
ו,יב  אִם-כֹּחַ אֲבָנִים כֹּחִי;    אִם-בְּשָׂרִי נָחוּשׁ.
ו,יג  הַאִם אֵין עֶזְרָתִי בִי;    וְתֻשִׁיָּה, נִדְּחָה מִמֶּנִּי.
ו,יד  לַמָּס מֵרֵעֵהוּ חָסֶד;    וְיִרְאַת שַׁדַּי יַעֲזוֹב.
ו,טו  אַחַי, בָּגְדוּ כְמוֹ-נָחַל;    כַּאֲפִיק נְחָלִים יַעֲבֹרוּ.
ו,טז  הַקֹּדְרִים מִנִּי-קָרַח;    עָלֵימוֹ, יִתְעַלֶּם-שָׁלֶג.
ו,יז  בְּעֵת יְזֹרְבוּ נִצְמָתוּ;    בְּחֻמּוֹ, נִדְעֲכוּ מִמְּקוֹמָם.
ו,יח  יִלָּפְתוּ, אָרְחוֹת דַּרְכָּם;    יַעֲלוּ בַתֹּהוּ וְיֹאבֵדוּ.
ו,יט  הִבִּיטוּ, אָרְחוֹת תֵּמָא;    הֲלִיכֹת שְׁבָא, קִוּוּ-לָמוֹ.
ו,כ  בֹּשׁוּ כִּי-בָטָח;    בָּאוּ עָדֶיהָ, וַיֶּחְפָּרוּ.
ו,כא  כִּי-עַתָּה, הֱיִיתֶם לֹא;    תִּרְאוּ חֲתַת, וַתִּירָאוּ.
ו,כב  הֲכִי-אָמַרְתִּי, הָבוּ לִי;    וּמִכֹּחֲכֶם, שִׁחֲדוּ בַעֲדִי.
ו,כג  וּמַלְּטוּנִי מִיַּד-צָר;    וּמִיַּד עָרִיצִים תִּפְדּוּנִי.
ו,כד  הוֹרוּנִי, וַאֲנִי אַחֲרִישׁ;    וּמַה-שָּׁגִיתִי, הָבִינוּ לִי.
ו,כה  מַה-נִּמְרְצוּ אִמְרֵי-יֹשֶׁר;    וּמַה-יּוֹכִיחַ הוֹכֵחַ מִכֶּם.
ו,כו  הַלְהוֹכַח מִלִּים תַּחְשֹׁבוּ;    וּלְרוּחַ, אִמְרֵי נוֹאָשׁ.
ו,כז  אַף-עַל-יָתוֹם תַּפִּילוּ;    וְתִכְרוּ, עַל-רֵיעֲכֶם.
ו,כח  וְעַתָּה, הוֹאִילוּ פְנוּ-בִי;    וְעַל-פְּנֵיכֶם, אִם-אֲכַזֵּב.
ו,כט  שׁוּבוּ-נָא, אַל-תְּהִי עַוְלָה;    ושבי (וְשֻׁבוּ) עוֹד, צִדְקִי-בָהּ.
ו,ל  הֲיֵשׁ-בִּלְשׁוֹנִי עַוְלָה;    אִם-חִכִּי, לֹא-יָבִין הַוּוֹת.
ז,א  הֲלֹא-צָבָא לֶאֱנוֹשׁ על- (עֲלֵי-) אָרֶץ;    וְכִימֵי שָׂכִיר יָמָיו.
ז,ב  כְּעֶבֶד יִשְׁאַף-צֵל;    וּכְשָׂכִיר, יְקַוֶּה פָעֳלוֹ.
ז,ג  כֵּן הָנְחַלְתִּי לִי, יַרְחֵי-שָׁוְא;    וְלֵילוֹת עָמָל, מִנּוּ-לִי.
ז,ד  אִם-שָׁכַבְתִּי--    וְאָמַרְתִּי, מָתַי אָקוּם וּמִדַּד-עָרֶב;
וְשָׂבַעְתִּי נְדֻדִים    עֲדֵי-נָשֶׁף.
ז,ה  לָבַשׁ בְּשָׂרִי רִמָּה, וגיש (וְגוּשׁ) עָפָר;    עוֹרִי רָגַע, וַיִּמָּאֵס.
ז,ו  יָמַי קַלּוּ, מִנִּי-אָרֶג;    וַיִּכְלוּ, בְּאֶפֶס תִּקְוָה.
ז,ז  זְכֹר, כִּי-רוּחַ חַיָּי;    לֹא-תָשׁוּב עֵינִי, לִרְאוֹת טוֹב.
ז,ח  לֹא-תְשׁוּרֵנִי, עֵין רֹאִי;    עֵינֶיךָ בִּי וְאֵינֶנִּי.
ז,ט  כָּלָה עָנָן, וַיֵּלַךְ;    כֵּן יוֹרֵד שְׁאוֹל, לֹא יַעֲלֶה.
ז,י  לֹא-יָשׁוּב עוֹד לְבֵיתוֹ;    וְלֹא-יַכִּירֶנּוּ עוֹד מְקֹמוֹ.
ז,יא  גַּם-אֲנִי,    לֹא אֶחֱשָׂךְ-פִּי:
אֲדַבְּרָה, בְּצַר רוּחִי;    אָשִׂיחָה, בְּמַר נַפְשִׁי.
ז,יב  הֲיָם-אָנִי, אִם-תַּנִּין:    כִּי-תָשִׂים עָלַי מִשְׁמָר.
ז,יג  כִּי-אָמַרְתִּי, תְּנַחֲמֵנִי עַרְשִׂי;    יִשָּׂא בְשִׂיחִי, מִשְׁכָּבִי.
ז,יד  וְחִתַּתַּנִי בַחֲלֹמוֹת;    וּמֵחֶזְיֹנוֹת תְּבַעֲתַנִּי.
ז,טו  וַתִּבְחַר מַחֲנָק נַפְשִׁי;    מָוֶת, מֵעַצְמוֹתָי.
ז,טז  מָאַסְתִּי, לֹא-לְעֹלָם אֶחְיֶה;    חֲדַל מִמֶּנִּי, כִּי-הֶבֶל יָמָי.
ז,יז  מָה-אֱנוֹשׁ, כִּי תְגַדְּלֶנּוּ;    וְכִי-תָשִׁית אֵלָיו לִבֶּךָ.
ז,יח  וַתִּפְקְדֶנּוּ לִבְקָרִים;    לִרְגָעִים, תִּבְחָנֶנּוּ.
ז,יט  כַּמָּה, לֹא-תִשְׁעֶה מִמֶּנִּי;    לֹא-תַרְפֵּנִי, עַד-בִּלְעִי רֻקִּי.
ז,כ  חָטָאתִי, מָה אֶפְעַל לָךְ--    נֹצֵר הָאָדָם:
לָמָה שַׂמְתַּנִי לְמִפְגָּע לָךְ;    וָאֶהְיֶה עָלַי לְמַשָּׂא.
ז,כא  וּמֶה, לֹא-תִשָּׂא פִשְׁעִי--    וְתַעֲבִיר אֶת-עֲו‍ֹנִי:
כִּי-עַתָּה, לֶעָפָר אֶשְׁכָּב;    וְשִׁחַרְתַּנִי וְאֵינֶנִּי.
ח,א                  וַיַּעַן, בִּלְדַּד הַשּׁוּחִי; וַיֹּאמַר.
ח,ב  עַד-אָן, תְּמַלֶּל-אֵלֶּה;    וְרוּחַ כַּבִּיר, אִמְרֵי-פִיךָ.
ח,ג  הַאֵל, יְעַוֵּת מִשְׁפָּט;    וְאִם-שַׁדַּי, יְעַוֵּת-צֶדֶק.
ח,ד  אִם-בָּנֶיךָ חָטְאוּ-לוֹ;    וַיְשַׁלְּחֵם, בְּיַד-פִּשְׁעָם.
ח,ה  אִם-אַתָּה, תְּשַׁחֵר אֶל-אֵל;    וְאֶל-שַׁדַּי, תִּתְחַנָּן.
ח,ו  אִם-זַךְ וְיָשָׁר, אָתָּה:    כִּי-עַתָּה, יָעִיר עָלֶיךָ; וְשִׁלַּם, נְוַת צִדְקֶךָ.
ח,ז  וְהָיָה רֵאשִׁיתְךָ מִצְעָר;    וְאַחֲרִיתְךָ, יִשְׂגֶּה מְאֹד.
ח,ח  כִּי-שְׁאַל-נָא, לְדֹר רִישׁוֹן;    וְכוֹנֵן, לְחֵקֶר אֲבוֹתָם.
ח,ט  כִּי-תְמוֹל אֲנַחְנוּ, וְלֹא נֵדָע:    כִּי צֵל יָמֵינוּ עֲלֵי-אָרֶץ.
ח,י  הֲלֹא-הֵם יוֹרוּךָ, יֹאמְרוּ לָךְ;    וּמִלִּבָּם, יוֹצִאוּ מִלִּים.
ח,יא  הֲיִגְאֶה-גֹּמֶא, בְּלֹא בִצָּה;    יִשְׂגֶּה-אָחוּ בְלִי-מָיִם.
ח,יב  עֹדֶנּוּ בְאִבּוֹ, לֹא יִקָּטֵף;    וְלִפְנֵי כָל-חָצִיר יִיבָשׁ.
ח,יג  כֵּן--אָרְחוֹת, כָּל-שֹׁכְחֵי אֵל;    וְתִקְוַת חָנֵף תֹּאבֵד.
ח,יד  אֲשֶׁר-יָקוֹט כִּסְלוֹ;    וּבֵית עַכָּבִישׁ, מִבְטַחוֹ.
ח,טו  יִשָּׁעֵן עַל-בֵּיתוֹ, וְלֹא יַעֲמֹד;    יַחֲזִיק בּוֹ, וְלֹא יָקוּם.
ח,טז  רָטֹב הוּא, לִפְנֵי-שָׁמֶשׁ;    וְעַל גַּנָּתוֹ, יֹנַקְתּוֹ תֵצֵא.
ח,יז  עַל-גַּל, שָׁרָשָׁיו יְסֻבָּכוּ;    בֵּית אֲבָנִים יֶחֱזֶה.
ח,יח  אִם-יְבַלְּעֶנּוּ מִמְּקֹמוֹ;    וְכִחֶשׁ בּוֹ, לֹא רְאִיתִיךָ.
ח,יט  הֶן-הוּא, מְשׂוֹשׂ דַּרְכּוֹ;    וּמֵעָפָר, אַחֵר יִצְמָחוּ.
ח,כ  הֶן-אֵל, לֹא יִמְאַס-תָּם;    וְלֹא-יַחֲזִיק, בְּיַד-מְרֵעִים.
ח,כא  עַד-יְמַלֵּה שְׂחוֹק פִּיךָ;    וּשְׂפָתֶיךָ תְרוּעָה.
ח,כב  שֹׂנְאֶיךָ יִלְבְּשׁוּ-בֹשֶׁת;    וְאֹהֶל רְשָׁעִים אֵינֶנּוּ.
ט,א                  וַיַּעַן אִיּוֹב, וַיֹּאמַר.
ט,ב  אָמְנָם, יָדַעְתִּי כִי-כֵן;    וּמַה-יִּצְדַּק אֱנוֹשׁ עִם-אֵל.
ט,ג  אִם-יַחְפֹּץ, לָרִיב עִמּוֹ--    לֹא-יַעֲנֶנּוּ, אַחַת מִנִּי-אָלֶף.
ט,ד  חֲכַם לֵבָב, וְאַמִּיץ כֹּחַ--    מִי-הִקְשָׁה אֵלָיו, וַיִּשְׁלָם.
ט,ה  הַמַּעְתִּיק הָרִים, וְלֹא יָדָעוּ--    אֲשֶׁר הֲפָכָם בְּאַפּוֹ.
ט,ו  הַמַּרְגִּיז אֶרֶץ, מִמְּקוֹמָהּ;    וְעַמּוּדֶיהָ, יִתְפַּלָּצוּן.
ט,ז  הָאֹמֵר לַחֶרֶס, וְלֹא יִזְרָח;    וּבְעַד כּוֹכָבִים יַחְתֹּם.
ט,ח  נֹטֶה שָׁמַיִם לְבַדּוֹ;    וְדוֹרֵךְ, עַל-בָּמֳתֵי יָם.
ט,ט  עֹשֶׂה-עָשׁ, כְּסִיל וְכִימָה;    וְחַדְרֵי תֵמָן.
ט,י  עֹשֶׂה גְדֹלוֹת, עַד-אֵין חֵקֶר;    וְנִפְלָאוֹת, עַד-אֵין מִסְפָּר.
ט,יא  הֵן יַעֲבֹר עָלַי, וְלֹא אֶרְאֶה;    וְיַחֲלֹף, וְלֹא-אָבִין לוֹ.
ט,יב  הֵן יַחְתֹּף, מִי יְשִׁיבֶנּוּ;    מִי-יֹאמַר אֵלָיו, מַה-תַּעֲשֶׂה.
ט,יג  אֱלוֹהַּ, לֹא-יָשִׁיב אַפּוֹ;    תַּחְתָּו שָׁחֲחוּ, עֹזְרֵי רָהַב.
ט,יד  אַף, כִּי-אָנֹכִי אֶעֱנֶנּוּ;    אֶבְחֲרָה דְבָרַי עִמּוֹ.
ט,טו  אֲשֶׁר אִם-צָדַקְתִּי, לֹא אֶעֱנֶה;    לִמְשֹׁפְטִי, אֶתְחַנָּן.
ט,טז  אִם-קָרָאתִי וַיַּעֲנֵנִי--    לֹא-אַאֲמִין, כִּי-יַאֲזִין קוֹלִי.
ט,יז  אֲשֶׁר-בִּשְׂעָרָה יְשׁוּפֵנִי;    וְהִרְבָּה פְצָעַי חִנָּם.
ט,יח  לֹא-יִתְּנֵנִי, הָשֵׁב רוּחִי:    כִּי יַשְׂבִּעַנִי, מַמְּרֹרִים.
ט,יט  אִם-לְכֹחַ אַמִּיץ הִנֵּה;    וְאִם-לְמִשְׁפָּט, מִי יוֹעִידֵנִי.
ט,כ  אִם-אֶצְדָּק, פִּי יַרְשִׁיעֵנִי;    תָּם-אָנִי, וַיַּעְקְשֵׁנִי.
ט,כא  תָּם-אָנִי, לֹא-אֵדַע נַפְשִׁי;    אֶמְאַס חַיָּי.
ט,כב  אַחַת, הִיא:    עַל-כֵּן אָמַרְתִּי--תָּם וְרָשָׁע, הוּא מְכַלֶּה.
ט,כג  אִם-שׁוֹט, יָמִית פִּתְאֹם--    לְמַסַּת נְקִיִּם יִלְעָג.
ט,כד  אֶרֶץ, נִתְּנָה בְיַד-רָשָׁע--    פְּנֵי-שֹׁפְטֶיהָ יְכַסֶּה;
אִם-לֹא אֵפוֹא    מִי-הוּא.
ט,כה  וְיָמַי קַלּוּ, מִנִּי-רָץ;    בָּרְחוּ, לֹא-רָאוּ טוֹבָה.
ט,כו  חָלְפוּ, עִם-אֳנִיּוֹת אֵבֶה;    כְּנֶשֶׁר, יָטוּשׂ עֲלֵי-אֹכֶל.
ט,כז  אִם-אָמְרִי, אֶשְׁכְּחָה שִׂיחִי;    אֶעֶזְבָה פָנַי וְאַבְלִיגָה.
ט,כח  יָגֹרְתִּי כָל-עַצְּבֹתָי;    יָדַעְתִּי, כִּי-לֹא תְנַקֵּנִי.
ט,כט  אָנֹכִי אֶרְשָׁע;    לָמָּה-זֶּה, הֶבֶל אִיגָע.
ט,ל  אִם-הִתְרָחַצְתִּי במו- (בְמֵי-) שָׁלֶג;    וַהֲזִכּוֹתִי, בְּבֹר כַּפָּי.
ט,לא  אָז, בַּשַּׁחַת תִּטְבְּלֵנִי;    וְתִעֲבוּנִי, שַׂלְמוֹתָי.
ט,לב  כִּי-לֹא-אִישׁ כָּמוֹנִי אֶעֱנֶנּוּ;    נָבוֹא יַחְדָּו, בַּמִּשְׁפָּט.
ט,לג  לֹא יֵשׁ-בֵּינֵינוּ מוֹכִיחַ--    יָשֵׁת יָדוֹ עַל-שְׁנֵינוּ.
ט,לד  יָסֵר מֵעָלַי שִׁבְטוֹ;    וְאֵמָתוֹ, אַל-תְּבַעֲתַנִּי.
ט,לה  אֲדַבְּרָה, וְלֹא אִירָאֶנּוּ:    כִּי לֹא-כֵן אָנֹכִי, עִמָּדִי.
י,א  נָקְטָה נַפְשִׁי, בְּחַיָּי:    אֶעֶזְבָה עָלַי שִׂיחִי; אֲדַבְּרָה, בְּמַר נַפְשִׁי.
י,ב  אֹמַר אֶל-אֱלוֹהַּ, אַל-תַּרְשִׁיעֵנִי;    הוֹדִיעֵנִי, עַל מַה-תְּרִיבֵנִי.
י,ג  הֲטוֹב לְךָ, כִּי תַעֲשֹׁק--כִּי-תִמְאַס, יְגִיעַ כַּפֶּיךָ;    וְעַל-עֲצַת רְשָׁעִים הוֹפָעְתָּ.
י,ד  הַעֵינֵי בָשָׂר לָךְ:    אִם-כִּרְאוֹת אֱנוֹשׁ תִּרְאֶה.
י,ה  הֲכִימֵי אֱנוֹשׁ יָמֶיךָ:    אִם-שְׁנוֹתֶיךָ, כִּימֵי גָבֶר.
י,ו  כִּי-תְבַקֵּשׁ לַעֲו‍ֹנִי;    וּלְחַטָּאתִי תִדְרוֹשׁ.
י,ז  עַל-דַּעְתְּךָ, כִּי-לֹא אֶרְשָׁע;    וְאֵין מִיָּדְךָ מַצִּיל.
י,ח  יָדֶיךָ עִצְּבוּנִי, וַיַּעֲשׂוּנִי;    יַחַד סָבִיב, וַתְּבַלְּעֵנִי.
י,ט  זְכָר-נָא, כִּי-כַחֹמֶר עֲשִׂיתָנִי;    וְאֶל-עָפָר תְּשִׁיבֵנִי.
י,י  הֲלֹא כֶחָלָב, תַּתִּיכֵנִי;    וְכַגְּבִנָּה, תַּקְפִּיאֵנִי.
י,יא  עוֹר וּבָשָׂר, תַּלְבִּישֵׁנִי;    וּבַעֲצָמוֹת וְגִידִים, תְּשֹׂכְכֵנִי.
י,יב  חַיִּים וָחֶסֶד, עָשִׂיתָ עִמָּדִי;    וּפְקֻדָּתְךָ, שָׁמְרָה רוּחִי.
י,יג  וְאֵלֶּה, צָפַנְתָּ בִלְבָבֶךָ;    יָדַעְתִּי, כִּי-זֹאת עִמָּךְ.
י,יד  אִם-חָטָאתִי וּשְׁמַרְתָּנִי;    וּמֵעֲו‍ֹנִי, לֹא תְנַקֵּנִי.
י,טו  אִם רָשַׁעְתִּי, אַלְלַי לִי--    וְצָדַקְתִּי, לֹא-אֶשָּׂא רֹאשִׁי;
שְׂבַע קָלוֹן,    וּרְאֵה עָנְיִי.
י,טז  וְיִגְאֶה, כַּשַּׁחַל תְּצוּדֵנִי;    וְתָשֹׁב, תִּתְפַּלָּא-בִי.
י,יז  תְּחַדֵּשׁ עֵדֶיךָ, נֶגְדִּי, וְתֶרֶב כַּעַשְׂךָ, עִמָּדִי;    חֲלִיפוֹת וְצָבָא עִמִּי.
י,יח  וְלָמָּה מֵרֶחֶם, הֹצֵאתָנִי;    אֶגְוַע, וְעַיִן לֹא-תִרְאֵנִי.
י,יט  כַּאֲשֶׁר לֹא-הָיִיתִי אֶהְיֶה;    מִבֶּטֶן, לַקֶּבֶר אוּבָל.
י,כ  הֲלֹא-מְעַט יָמַי יחדל (וַחֲדָל);    ישית (וְשִׁית) מִמֶּנִּי, וְאַבְלִיגָה מְּעָט.
י,כא  בְּטֶרֶם אֵלֵךְ, וְלֹא אָשׁוּב--    אֶל-אֶרֶץ חֹשֶׁךְ וְצַלְמָוֶת.
י,כב  אֶרֶץ עֵפָתָה, כְּמוֹ אֹפֶל--צַלְמָוֶת, וְלֹא סְדָרִים;    וַתֹּפַע כְּמוֹ-אֹפֶל.
יא,א                  וַיַּעַן, צֹפַר הַנַּעֲמָתִי; וַיֹּאמַר.
יא,ב  הֲרֹב דְּבָרִים, לֹא יֵעָנֶה;    וְאִם-אִישׁ שְׂפָתַיִם יִצְדָּק.
יא,ג  בַּדֶּיךָ, מְתִים יַחֲרִישׁוּ;    וַתִּלְעַג, וְאֵין מַכְלִם.
יא,ד  וַתֹּאמֶר, זַךְ לִקְחִי;    וּבַר, הָיִיתִי בְעֵינֶיךָ.
יא,ה  וְאוּלָם--מִי יִתֵּן אֱלוֹהַּ דַּבֵּר;    וְיִפְתַּח שְׂפָתָיו עִמָּךְ.
יא,ו  וְיַגֶּד-לְךָ, תַּעֲלֻמוֹת חָכְמָה--    כִּי-כִפְלַיִם לְתוּשִׁיָּה:
וְדַע--    כִּי-יַשֶּׁה לְךָ אֱלוֹהַּ, מֵעֲו‍ֹנֶךָ.
יא,ז  הַחֵקֶר אֱלוֹהַּ תִּמְצָא;    אִם עַד-תַּכְלִית שַׁדַּי תִּמְצָא.
יא,ח  גָּבְהֵי שָׁמַיִם, מַה-תִּפְעָל;    עֲמֻקָּה מִשְּׁאוֹל, מַה-תֵּדָע.
יא,ט  אֲרֻכָּה מֵאֶרֶץ מִדָּהּ;    וּרְחָבָה, מִנִּי-יָם.
יא,י  אִם-יַחֲלֹף וְיַסְגִּיר;    וְיַקְהִיל, וּמִי יְשִׁיבֶנּוּ.
יא,יא  כִּי-הוּא, יָדַע מְתֵי-שָׁוְא;    וַיַּרְא-אָוֶן, וְלֹא יִתְבּוֹנָן.
יא,יב  וְאִישׁ נָבוּב, יִלָּבֵב;    וְעַיִר פֶּרֶא, אָדָם יִוָּלֵד.
יא,יג  אִם-אַתָּה, הֲכִינוֹתָ לִבֶּךָ;    וּפָרַשְׂתָּ אֵלָיו כַּפּיֶךָ.
יא,יד  אִם-אָוֶן בְּיָדְךָ, הַרְחִיקֵהוּ;    וְאַל-תַּשְׁכֵּן בְּאֹהָלֶיךָ עַוְלָה.
יא,טו  כִּי-אָז, תִּשָּׂא פָנֶיךָ מִמּוּם;    וְהָיִיתָ מֻצָק, וְלֹא תִירָא.
יא,טז  כִּי-אַתָּה, עָמָל תִּשְׁכָּח;    כְּמַיִם עָבְרוּ תִזְכֹּר.
יא,יז  וּמִצָּהֳרַיִם, יָקוּם חָלֶד;    תָּעֻפָה, כַּבֹּקֶר תִּהְיֶה.
יא,יח  וּבָטַחְתָּ, כִּי-יֵשׁ תִּקְוָה;    וְחָפַרְתָּ, לָבֶטַח תִּשְׁכָּב.
יא,יט  וְרָבַצְתָּ, וְאֵין מַחֲרִיד;    וְחִלּוּ פָנֶיךָ רַבִּים.
יא,כ  וְעֵינֵי רְשָׁעִים, תִּכְלֶינָה:    וּמָנוֹס, אָבַד מִנְּהֶם; וְתִקְוָתָם, מַפַּח-נָפֶשׁ.
יב,א                  וַיַּעַן אִיּוֹב, וַיֹּאמַר.
יב,ב  אָמְנָם, כִּי אַתֶּם-עָם;    וְעִמָּכֶם, תָּמוּת חָכְמָה.
יב,ג  גַּם-לִי לֵבָב, כְּמוֹכֶם--לֹא-נֹפֵל אָנֹכִי מִכֶּם;    וְאֶת-מִי-אֵין כְּמוֹ-אֵלֶּה.
יב,ד  שְׂחֹק לְרֵעֵהוּ, אֶהְיֶה--קֹרֵא לֶאֱלוֹהַּ, וַיַּעֲנֵהוּ;    שְׂחוֹק, צַדִּיק תָּמִים.
יב,ה  לַפִּיד בּוּז, לְעַשְׁתּוּת שַׁאֲנָן--    נָכוֹן, לְמוֹעֲדֵי רָגֶל.
יב,ו  יִשְׁלָיוּ אֹהָלִים, לְשֹׁדְדִים, וּבַטֻּחוֹת, לְמַרְגִּיזֵי אֵל--    לַאֲשֶׁר הֵבִיא אֱלוֹהַּ בְּיָדוֹ.
יב,ז  וְאוּלָם--שְׁאַל-נָא בְהֵמוֹת וְתֹרֶךָּ;    וְעוֹף הַשָּׁמַיִם, וְיַגֶּד-לָךְ.
יב,ח  אוֹ שִׂיחַ לָאָרֶץ וְתֹרֶךָּ;    וִיסַפְּרוּ לְךָ, דְּגֵי הַיָּם.
יב,ט  מִי, לֹא-יָדַע בְּכָל-אֵלֶּה:    כִּי יַד-יְהוָה, עָשְׂתָה זֹּאת.
יב,י  אֲשֶׁר בְּיָדוֹ, נֶפֶשׁ כָּל-חָי;    וְרוּחַ, כָּל-בְּשַׂר-אִישׁ.
יב,יא  הֲלֹא-אֹזֶן, מִלִּין תִּבְחָן;    וְחֵךְ, אֹכֶל יִטְעַם-לוֹ.
יב,יב  בִּישִׁישִׁים חָכְמָה;    וְאֹרֶךְ יָמִים תְּבוּנָה.
יב,יג  עִמּוֹ, חָכְמָה וּגְבוּרָה;    לוֹ, עֵצָה וּתְבוּנָה.
יב,יד  הֵן יַהֲרוֹס, וְלֹא יִבָּנֶה;    יִסְגֹּר עַל-אִישׁ, וְלֹא יִפָּתֵחַ.
יב,טו  הֵן יַעְצֹר בַּמַּיִם וְיִבָשׁוּ;    וִישַׁלְּחֵם, וְיַהַפְכוּ אָרֶץ.
יב,טז  עִמּוֹ, עֹז וְתוּשִׁיָּה;    לוֹ, שֹׁגֵג וּמַשְׁגֶּה.
יב,יז  מוֹלִיךְ יוֹעֲצִים שׁוֹלָל;    וְשֹׁפְטִים יְהוֹלֵל.
יב,יח  מוּסַר מְלָכִים פִּתֵּחַ;    וַיֶּאְסֹר אֵזוֹר, בְּמָתְנֵיהֶם.
יב,יט  מוֹלִיךְ כֹּהֲנִים שׁוֹלָל;    וְאֵתָנִים יְסַלֵּף.
יב,כ  מֵסִיר שָׂפָה, לְנֶאֱמָנִים;    וְטַעַם זְקֵנִים יִקָּח.
יב,כא  שׁוֹפֵךְ בּוּז, עַל-נְדִיבִים;    וּמְזִיחַ אֲפִיקִים רִפָּה.
יב,כב  מְגַלֶּה עֲמֻקוֹת, מִנִּי-חֹשֶׁךְ;    וַיֹּצֵא לָאוֹר צַלְמָוֶת.
יב,כג  מַשְׂגִּיא לַגּוֹיִם, וַיְאַבְּדֵם;    שֹׁטֵחַ לַגּוֹיִם, וַיַּנְחֵם.
יב,כד  מֵסִיר--לֵב, רָאשֵׁי עַם-הָאָרֶץ;    וַיַּתְעֵם, בְּתֹהוּ לֹא-דָרֶךְ.
יב,כה  יְמַשְׁשׁוּ-חֹשֶׁךְ וְלֹא-אוֹר;    וַיַּתְעֵם, כַּשִּׁכּוֹר.
יג,א  הֶן-כֹּל, רָאֲתָה עֵינִי;    שָׁמְעָה אָזְנִי, וַתָּבֶן לָהּ.
יג,ב  כְּדַעְתְּכֶם, יָדַעְתִּי גַם-אָנִי:    לֹא-נֹפֵל אָנֹכִי מִכֶּם.
יג,ג  אוּלָם--אֲנִי, אֶל-שַׁדַּי אֲדַבֵּר;    וְהוֹכֵחַ אֶל-אֵל אֶחְפָּץ.
יג,ד  וְאוּלָם, אַתֶּם טֹפְלֵי-שָׁקֶר;    רֹפְאֵי אֱלִל כֻּלְּכֶם.
יג,ה  מִי-יִתֵּן, הַחֲרֵשׁ תַּחֲרִישׁוּן;    וּתְהִי לָכֶם לְחָכְמָה.
יג,ו  שִׁמְעוּ-נָא תוֹכַחְתִּי;    וְרִבוֹת שְׂפָתַי הַקְשִׁיבוּ.
יג,ז  הַלְאֵל, תְּדַבְּרוּ עַוְלָה;    וְלוֹ, תְּדַבְּרוּ רְמִיָּה.
יג,ח  הֲפָנָיו תִּשָּׂאוּן;    אִם-לָאֵל תְּרִיבוּן.
יג,ט  הֲטוֹב, כִּי-יַחְקֹר אֶתְכֶם;    אִם-כְּהָתֵל בֶּאֱנוֹשׁ, תְּהָתֵלּוּ בוֹ.
יג,י  הוֹכֵחַ יוֹכִיחַ אֶתְכֶם--    אִם-בַּסֵּתֶר, פָּנִים תִּשָּׂאוּן.
יג,יא  הֲלֹא שְׂאֵתוֹ, תְּבַעֵת אֶתְכֶם;    וּפַחְדּוֹ, יִפֹּל עֲלֵיכֶם.
יג,יב  זִכְרֹנֵיכֶם, מִשְׁלֵי-אֵפֶר;    לְגַבֵּי-חֹמֶר, גַּבֵּיכֶם.
יג,יג  הַחֲרִישׁוּ מִמֶּנִּי, וַאֲדַבְּרָה-אָנִי;    וְיַעֲבֹר עָלַי מָה.
יג,יד  עַל-מָה, אֶשָּׂא בְשָׂרִי בְשִׁנָּי;    וְנַפְשִׁי, אָשִׂים בְּכַפִּי.
יג,טו  הֵן יִקְטְלֵנִי, לא (לוֹ) אֲיַחֵל;    אַךְ-דְּרָכַי, אֶל-פָּנָיו אוֹכִיחַ.
יג,טז  גַּם-הוּא-לִי לִישׁוּעָה:    כִּי-לֹא לְפָנָיו, חָנֵף יָבוֹא.
יג,יז  שִׁמְעוּ שָׁמוֹעַ, מִלָּתִי;    וְאַחֲוָתִי, בְּאָזְנֵיכֶם.
יג,יח  הִנֵּה-נָא, עָרַכְתִּי מִשְׁפָּט;    יָדַעְתִּי, כִּי-אֲנִי אֶצְדָּק.
יג,יט  מִי-הוּא, יָרִיב עִמָּדִי:    כִּי-עַתָּה אַחֲרִישׁ וְאֶגְוָע.
יג,כ  אַךְ-שְׁתַּיִם, אַל-תַּעַשׂ עִמָּדִי;    אָז מִפָּנֶיךָ, לֹא אֶסָּתֵר.
יג,כא  כַּפְּךָ, מֵעָלַי הַרְחַק;    וְאֵמָתְךָ, אַל-תְּבַעֲתַנִּי.
יג,כב  וּקְרָא, וְאָנֹכִי אֶעֱנֶה;    אוֹ-אֲדַבֵּר, וַהֲשִׁיבֵנִי.
יג,כג  כַּמָּה לִי, עֲו‍ֹנוֹת וְחַטָּאוֹת--    פִּשְׁעִי וְחַטָּאתִי, הֹדִיעֵנִי.
יג,כד  לָמָּה-פָנֶיךָ תַסְתִּיר;    וְתַחְשְׁבֵנִי לְאוֹיֵב לָךְ.
יג,כה  הֶעָלֶה נִדָּף תַּעֲרוֹץ;    וְאֶת-קַשׁ יָבֵשׁ תִּרְדֹּף.
יג,כו  כִּי-תִכְתֹּב עָלַי מְרֹרוֹת;    וְתוֹרִישֵׁנִי, עֲו‍ֹנוֹת נְעוּרָי.
יג,כז  וְתָשֵׂם בַּסַּד, רַגְלַי--    וְתִשְׁמוֹר כָּל-אָרְחוֹתָי;
עַל-שָׁרְשֵׁי רַגְלַי,    תִּתְחַקֶּה.
יג,כח  וְהוּא, כְּרָקָב יִבְלֶה;    כְּבֶגֶד, אֲכָלוֹ עָשׁ.
יד,א  אָדָם, יְלוּד אִשָּׁה--    קְצַר יָמִים, וּשְׂבַע-רֹגֶז.
יד,ב  כְּצִיץ יָצָא, וַיִּמָּל;    וַיִּבְרַח כַּצֵּל, וְלֹא יַעֲמוֹד.
יד,ג  אַף-עַל-זֶה, פָּקַחְתָּ עֵינֶךָ;    וְאֹתִי תָבִיא בְמִשְׁפָּט עִמָּךְ.
יד,ד  מִי-יִתֵּן טָהוֹר, מִטָּמֵא--    לֹא אֶחָד.
יד,ה  אִם חֲרוּצִים, יָמָיו--מִסְפַּר-חֳדָשָׁיו אִתָּךְ:    חֻקָּו עָשִׂיתָ, וְלֹא יַעֲבֹר.
יד,ו  שְׁעֵה מֵעָלָיו וְיֶחְדָּל--    עַד-יִרְצֶה, כְּשָׂכִיר יוֹמוֹ.
יד,ז  כִּי יֵשׁ לָעֵץ,    תִּקְוָה:
אִם-יִכָּרֵת, וְעוֹד יַחֲלִיף;    וְיֹנַקְתּוֹ, לֹא תֶחְדָּל.
יד,ח  אִם-יַזְקִין בָּאָרֶץ שָׁרְשׁוֹ;    וּבֶעָפָר, יָמוּת גִּזְעוֹ.
יד,ט  מֵרֵיחַ מַיִם יַפְרִחַ;    וְעָשָׂה קָצִיר כְּמוֹ-נָטַע.
יד,י  וְגֶבֶר יָמוּת, וַיֶּחֱלָשׁ;    וַיִּגְוַע אָדָם וְאַיּוֹ.
יד,יא  אָזְלוּ-מַיִם, מִנִּי-יָם;    וְנָהָר, יֶחֱרַב וְיָבֵשׁ.
יד,יב  וְאִישׁ שָׁכַב,    וְלֹא-יָקוּם:
עַד-בִּלְתִּי שָׁמַיִם, לֹא יָקִיצוּ;    וְלֹא-יֵעֹרוּ, מִשְּׁנָתָם.
יד,יג  מִי יִתֵּן, בִּשְׁאוֹל תַּצְפִּנֵנִי--    תַּסְתִּירֵנִי, עַד-שׁוּב אַפֶּךָ;
תָּשִׁית לִי חֹק    וְתִזְכְּרֵנִי.
יד,יד  אִם-יָמוּת גֶּבֶר,    הֲיִחְיֶה:
כָּל-יְמֵי צְבָאִי אֲיַחֵל--    עַד-בּוֹא, חֲלִיפָתִי.
יד,טו  תִּקְרָא, וְאָנֹכִי אֶעֱנֶךָּ;    לְמַעֲשֵׂה יָדֶיךָ תִכְסֹף.
יד,טז  כִּי-עַתָּה, צְעָדַי תִּסְפּוֹר;    לֹא-תִשְׁמֹר, עַל-חַטָּאתִי.
יד,יז  חָתֻם בִּצְרוֹר פִּשְׁעִי;    וַתִּטְפֹּל, עַל-עֲו‍ֹנִי.
יד,יח  וְאוּלָם, הַר-נוֹפֵל יִבּוֹל;    וְצוּר, יֶעְתַּק מִמְּקֹמוֹ.
יד,יט  אֲבָנִים, שָׁחֲקוּ מַיִם--    תִּשְׁטֹף-סְפִיחֶיהָ עֲפַר-אָרֶץ;
וְתִקְוַת אֱנוֹשׁ    הֶאֱבַדְתָּ.
יד,כ  תִּתְקְפֵהוּ לָנֶצַח, וַיַּהֲלֹךְ;    מְשַׁנֶּה פָנָיו, וַתְּשַׁלְּחֵהוּ.
יד,כא  יִכְבְּדוּ בָנָיו, וְלֹא יֵדָע;    וְיִצְעֲרוּ, וְלֹא-יָבִין לָמוֹ.
יד,כב  אַךְ-בְּשָׂרוֹ, עָלָיו יִכְאָב;    וְנַפְשׁוֹ, עָלָיו תֶּאֱבָל.
טו,א                  וַיַּעַן, אֱלִיפַז הַתֵּימָנִי; וַיֹּאמַר.
טו,ב  הֶחָכָם, יַעֲנֶה דַעַת-רוּחַ;    וִימַלֵּא קָדִים בִּטְנוֹ.
טו,ג  הוֹכֵחַ בְּדָבָר, לֹא-יִסְכּוֹן;    וּמִלִּים, לֹא-יוֹעִיל בָּם.
טו,ד  אַף-אַתָּה, תָּפֵר יִרְאָה;    וְתִגְרַע שִׂיחָה, לִפְנֵי-אֵל.
טו,ה  כִּי יְאַלֵּף עֲו‍ֹנְךָ פִיךָ;    וְתִבְחַר, לְשׁוֹן עֲרוּמִים.
טו,ו  יַרְשִׁיעֲךָ פִיךָ וְלֹא-אָנִי;    וּשְׂפָתֶיךָ, יַעֲנוּ-בָךְ.
טו,ז  הֲרִאישׁוֹן אָדָם, תִּוָּלֵד;    וְלִפְנֵי גְבָעוֹת חוֹלָלְתָּ.
טו,ח  הַבְסוֹד אֱלוֹהַּ תִּשְׁמָע;    וְתִגְרַע אֵלֶיךָ חָכְמָה.
טו,ט  מַה-יָּדַעְתָּ, וְלֹא נֵדָע;    תָּבִין, וְלֹא-עִמָּנוּ הוּא.
טו,י  גַּם-שָׂב גַּם-יָשִׁישׁ בָּנוּ--    כַּבִּיר מֵאָבִיךָ יָמִים.
טו,יא  הַמְעַט מִמְּךָ, תַּנְחוּמוֹת אֵל;    וְדָבָר, לָאַט עִמָּךְ.
טו,יב  מַה-יִּקָּחֲךָ לִבֶּךָ;    וּמַה-יִּרְזְמוּן עֵינֶיךָ.
טו,יג  כִּי-תָשִׁיב אֶל-אֵל רוּחֶךָ;    וְהֹצֵאתָ מִפִּיךָ מִלִּין.
טו,יד  מָה-אֱנוֹשׁ כִּי-יִזְכֶּה;    וְכִי-יִצְדַּק, יְלוּד אִשָּׁה.
טו,טו  הֵן בִּקְדֹשָׁו, לֹא יַאֲמִין;    וְשָׁמַיִם, לֹא-זַכּוּ בְעֵינָיו.
טו,טז  אַף, כִּי-נִתְעָב וְנֶאֱלָח;    אִישׁ-שֹׁתֶה כַמַּיִם עַוְלָה.
טו,יז  אֲחַוְךָ שְׁמַע-לִי;    וְזֶה-חָזִיתִי, וַאֲסַפֵּרָה.
טו,יח  אֲשֶׁר-חֲכָמִים יַגִּידוּ;    וְלֹא כִחֲדוּ, מֵאֲבוֹתָם.
טו,יט  לָהֶם לְבַדָּם, נִתְּנָה הָאָרֶץ;    וְלֹא-עָבַר זָר בְּתוֹכָם.
טו,כ  כָּל-יְמֵי רָשָׁע, הוּא מִתְחוֹלֵל;    וּמִסְפַּר שָׁנִים, נִצְפְּנוּ לֶעָרִיץ.
טו,כא  קוֹל-פְּחָדִים בְּאָזְנָיו;    בַּשָּׁלוֹם, שׁוֹדֵד יְבוֹאֶנּוּ.
טו,כב  לֹא-יַאֲמִין שׁוּב, מִנִּי-חֹשֶׁךְ;    וצפו (וְצָפוּי) הוּא אֱלֵי-חָרֶב.
טו,כג  נֹדֵד הוּא לַלֶּחֶם אַיֵּה;    יָדַע, כִּי-נָכוֹן בְּיָדוֹ יוֹם-חֹשֶׁךְ.
טו,כד  יְבַעֲתֻהוּ, צַר וּמְצוּקָה;    תִּתְקְפֵהוּ, כְּמֶלֶךְ עָתִיד לַכִּידוֹר.
טו,כה  כִּי-נָטָה אֶל-אֵל יָדוֹ;    וְאֶל-שַׁדַּי, יִתְגַּבָּר.
טו,כו  יָרוּץ אֵלָיו בְּצַוָּאר;    בַּעֲבִי, גַּבֵּי מָגִנָּיו.
טו,כז  כִּי-כִסָּה פָנָיו בְּחֶלְבּוֹ;    וַיַּעַשׂ פִּימָה עֲלֵי-כָסֶל.
טו,כח  וַיִּשְׁכּוֹן, עָרִים נִכְחָדוֹת--בָּתִּים, לֹא-יֵשְׁבוּ לָמוֹ:    אֲשֶׁר הִתְעַתְּדוּ לְגַלִּים.
טו,כט  לֹא-יֶעְשַׁר, וְלֹא-יָקוּם חֵילוֹ;    וְלֹא-יִטֶּה לָאָרֶץ מִנְלָם.
טו,ל  לֹא-יָסוּר, מִנִּי-חֹשֶׁךְ--יֹנַקְתּוֹ, תְּיַבֵּשׁ שַׁלְהָבֶת;    וְיָסוּר, בְּרוּחַ פִּיו.
טו,לא  אַל-יַאֲמֵן בַּשָּׁו נִתְעָה:    כִּי-שָׁוְא, תִּהְיֶה תְמוּרָתוֹ.
טו,לב  בְּלֹא-יוֹמוֹ, תִּמָּלֵא;    וְכִפָּתוֹ, לֹא רַעֲנָנָה.
טו,לג  יַחְמֹס כַּגֶּפֶן בִּסְרוֹ;    וְיַשְׁלֵךְ כַּזַּיִת, נִצָּתוֹ.
טו,לד  כִּי-עֲדַת חָנֵף גַּלְמוּד;    וְאֵשׁ, אָכְלָה אָהֳלֵי-שֹׁחַד.
טו,לה  הָרֹה עָמָל, וְיָלֹד אָוֶן;    וּבִטְנָם, תָּכִין מִרְמָה.
טז,א                  וַיַּעַן אִיּוֹב, וַיֹּאמַר.
טז,ב  שָׁמַעְתִּי כְאֵלֶּה רַבּוֹת;    מְנַחֲמֵי עָמָל כֻּלְּכֶם.
טז,ג  הֲקֵץ לְדִבְרֵי-רוּחַ;    אוֹ מַה-יַּמְרִיצְךָ, כִּי תַעֲנֶה.
טז,ד  גַּם, אָנֹכִי--    כָּכֶם אֲדַבֵּרָה:
לוּ יֵשׁ נַפְשְׁכֶם, תַּחַת נַפְשִׁי--    אַחְבִּירָה עֲלֵיכֶם בְּמִלִּים;
וְאָנִיעָה עֲלֵיכֶם,    בְּמוֹ רֹאשִׁי.
טז,ה  אֲאַמִּצְכֶם בְּמוֹ-פִי;    וְנִיד שְׂפָתַי יַחְשֹׂךְ.
טז,ו  אִם-אֲדַבְּרָה, לֹא-יֵחָשֵׂךְ כְּאֵבִי;    וְאַחְדְּלָה, מַה-מִּנִּי יַהֲלֹךְ.
טז,ז  אַךְ-עַתָּה הֶלְאָנִי;    הֲשִׁמּוֹתָ, כָּל-עֲדָתִי.
טז,ח  וַתִּקְמְטֵנִי, לְעֵד הָיָה;    וַיָּקָם בִּי כַחֲשִׁי, בְּפָנַי יַעֲנֶה.
טז,ט  אַפּוֹ טָרַף, וַיִּשְׂטְמֵנִי--חָרַק עָלַי בְּשִׁנָּיו;    צָרִי, יִלְטֹשׁ עֵינָיו לִי.
טז,י  פָּעֲרוּ עָלַי, בְּפִיהֶם--בְּחֶרְפָּה, הִכּוּ לְחָיָי;    יַחַד, עָלַי יִתְמַלָּאוּן.
טז,יא  יַסְגִּירֵנִי אֵל, אֶל עֲוִיל;    וְעַל-יְדֵי רְשָׁעִים יִרְטֵנִי.
טז,יב  שָׁלֵו הָיִיתִי, וַיְפַרְפְּרֵנִי--    וְאָחַז בְּעָרְפִּי, וַיְפַצְפְּצֵנִי;
וַיְקִימֵנִי לוֹ,    לְמַטָּרָה.
טז,יג  יָסֹבּוּ עָלַי, רַבָּיו--    יְפַלַּח כִּלְיוֹתַי, וְלֹא יַחְמֹל;
יִשְׁפֹּךְ לָאָרֶץ,    מְרֵרָתִי.
טז,יד  יִפְרְצֵנִי פֶרֶץ, עַל-פְּנֵי-פָרֶץ;    יָרֻץ עָלַי כְּגִבּוֹר.
טז,טו  שַׂק תָּפַרְתִּי, עֲלֵי גִלְדִּי;    וְעֹלַלְתִּי בֶעָפָר קַרְנִי.
טז,טז  פָּנַי חמרמרה (חֳמַרְמְרוּ), מִנִּי-בֶכִי;    וְעַל עַפְעַפַּי צַלְמָוֶת.
טז,יז  עַל, לֹא-חָמָס בְּכַפָּי;    וּתְפִלָּתִי זַכָּה.
טז,יח  אֶרֶץ, אַל-תְּכַסִּי דָמִי;    וְאַל-יְהִי מָקוֹם, לְזַעֲקָתִי.
טז,יט  גַּם-עַתָּה, הִנֵּה-בַשָּׁמַיִם עֵדִי;    וְשָׂהֲדִי, בַּמְּרֹמִים.
טז,כ  מְלִיצַי רֵעָי;    אֶל-אֱלוֹהַּ, דָּלְפָה עֵינִי.
טז,כא  וְיוֹכַח לְגֶבֶר עִם-אֱלוֹהַּ;    וּבֶן-אָדָם לְרֵעֵהוּ.
טז,כב  כִּי-שְׁנוֹת מִסְפָּר יֶאֱתָיוּ;    וְאֹרַח לֹא-אָשׁוּב אֶהֱלֹךְ.
יז,א  רוּחִי חֻבָּלָה, יָמַי נִזְעָכוּ;    קְבָרִים לִי.
יז,ב  אִם-לֹא הֲתֻלִים, עִמָּדִי;    וּבְהַמְּרוֹתָם, תָּלַן עֵינִי.
יז,ג  שִׂימָה-נָּא, עָרְבֵנִי עִמָּךְ;    מִי הוּא, לְיָדִי יִתָּקֵעַ.
יז,ד  כִּי-לִבָּם, צָפַנְתָּ מִּשָּׂכֶל;    עַל-כֵּן, לֹא תְרֹמֵם.
יז,ה  לְחֵלֶק, יַגִּיד רֵעִים;    וְעֵינֵי בָנָיו תִּכְלֶנָה.
יז,ו  וְהִצִּיגַנִי, לִמְשֹׁל עַמִּים;    וְתֹפֶת לְפָנִים אֶהְיֶה.
יז,ז  וַתֵּכַהּ מִכַּעַשׂ עֵינִי;    וִיצֻרַי כַּצֵּל כֻּלָּם.
יז,ח  יָשֹׁמּוּ יְשָׁרִים עַל-זֹאת;    וְנָקִי, עַל-חָנֵף יִתְעֹרָר.
יז,ט  וְיֹאחֵז צַדִּיק דַּרְכּוֹ;    וּטְהָר-יָדַיִם, יֹסִיף אֹמֶץ.
יז,י  וְאוּלָם--כֻּלָּם תָּשֻׁבוּ, וּבֹאוּ נָא;    וְלֹא-אֶמְצָא בָכֶם חָכָם.
יז,יא  יָמַי עָבְרוּ, זִמֹּתַי נִתְּקוּ--    מוֹרָשֵׁי לְבָבִי.
יז,יב  לַיְלָה, לְיוֹם יָשִׂימוּ;    אוֹר, קָרוֹב מִפְּנֵי-חֹשֶׁךְ.
יז,יג  אִם-אֲקַוֶּה, שְׁאוֹל בֵּיתִי;    בַּחֹשֶׁךְ, רִפַּדְתִּי יְצוּעָי.
יז,יד  לַשַּׁחַת קָרָאתִי, אָבִי אָתָּה;    אִמִּי וַאֲחֹתִי, לָרִמָּה.
יז,טו  וְאַיֵּה, אֵפוֹ תִקְוָתִי;    וְתִקְוָתִי, מִי יְשׁוּרֶנָּה.
יז,טז  בַּדֵּי שְׁאֹל תֵּרַדְנָה;    אִם-יַחַד עַל-עָפָר נָחַת.
יח,א                  וַיַּעַן, בִּלְדַּד הַשֻּׁחִי; וַיֹּאמַר.
יח,ב  עַד-אָנָה, תְּשִׂימוּן קִנְצֵי לְמִלִּין;    תָּבִינוּ, וְאַחַר נְדַבֵּר.
יח,ג  מַדּוּעַ, נֶחְשַׁבְנוּ כַבְּהֵמָה;    נִטְמִינוּ, בְּעֵינֵיכֶם.
יח,ד  טֹרֵף נַפְשׁוֹ, בְּאַפּוֹ:    הַלְמַעַנְךָ, תֵּעָזַב אָרֶץ; וְיֶעְתַּק-צוּר, מִמְּקֹמוֹ.
יח,ה  גַּם אוֹר רְשָׁעִים יִדְעָךְ;    וְלֹא-יִגַּהּ, שְׁבִיב אִשּׁוֹ.
יח,ו  אוֹר, חָשַׁךְ בְּאָהֳלוֹ;    וְנֵרוֹ, עָלָיו יִדְעָךְ.
יח,ז  יֵצְרוּ, צַעֲדֵי אוֹנוֹ;    וְתַשְׁלִיכֵהוּ עֲצָתוֹ.
יח,ח  כִּי-שֻׁלַּח בְּרֶשֶׁת בְּרַגְלָיו;    וְעַל-שְׂבָכָה, יִתְהַלָּךְ.
יח,ט  יֹאחֵז בְּעָקֵב פָּח;    יַחֲזֵק עָלָיו צַמִּים.
יח,י  טָמוּן בָּאָרֶץ חַבְלוֹ;    וּמַלְכֻּדְתּוֹ, עֲלֵי נָתִיב.
יח,יא  סָבִיב, בִּעֲתֻהוּ בַלָּהוֹת;    וֶהֱפִיצֻהוּ לְרַגְלָיו.
יח,יב  יְהִי-רָעֵב אֹנוֹ;    וְאֵיד, נָכוֹן לְצַלְעוֹ.
יח,יג  יֹאכַל, בַּדֵּי עוֹרוֹ;    יֹאכַל בַּדָּיו, בְּכוֹר מָוֶת.
יח,יד  יִנָּתֵק מֵאָהֳלוֹ, מִבְטַחוֹ;    וְתַצְעִדֵהוּ, לְמֶלֶךְ בַּלָּהוֹת.
יח,טו  תִּשְׁכּוֹן בְּאָהֳלוֹ, מִבְּלִילוֹ;    יְזֹרֶה עַל-נָוֵהוּ גָפְרִית.
יח,טז  מִתַּחַת, שָׁרָשָׁיו יִבָשׁוּ;    וּמִמַּעַל, יִמַּל קְצִירוֹ.
יח,יז  זִכְרוֹ-אָבַד, מִנִּי-אָרֶץ;    וְלֹא-שֵׁם לוֹ, עַל-פְּנֵי-חוּץ.
יח,יח  יֶהְדְּפֻהוּ, מֵאוֹר אֶל-חֹשֶׁךְ;    וּמִתֵּבֵל יְנִדֻּהוּ.
יח,יט  לֹא נִין לוֹ וְלֹא-נֶכֶד בְּעַמּוֹ;    וְאֵין שָׂרִיד, בִּמְגוּרָיו.
יח,כ  עַל-יוֹמוֹ, נָשַׁמּוּ אַחֲרֹנִים;    וְקַדְמֹנִים, אָחֲזוּ שָׂעַר.
יח,כא  אַךְ-אֵלֶּה, מִשְׁכְּנוֹת עַוָּל;    וְזֶה, מְקוֹם לֹא-יָדַע-אֵל.
יט,א                  וַיַּעַן אִיּוֹב, וַיֹּאמַר.
יט,ב  עַד-אָנָה, תּוֹגְיוּן נַפְשִׁי;    וּתְדַכְּאוּנַנִי בְמִלִּים.
יט,ג  זֶה עֶשֶׂר פְּעָמִים, תַּכְלִימוּנִי;    לֹא-תֵבֹשׁוּ, תַּהְכְּרוּ-לִי.
יט,ד  וְאַף-אָמְנָם שָׁגִיתִי;    אִתִּי, תָּלִין מְשׁוּגָתִי.
יט,ה  אִם-אָמְנָם, עָלַי תַּגְדִּילוּ;    וְתוֹכִיחוּ עָלַי, חֶרְפָּתִי.
יט,ו  דְּעוּ-אֵפוֹ, כִּי-אֱלוֹהַּ עִוְּתָנִי;    וּמְצוּדוֹ, עָלַי הִקִּיף.
יט,ז  הֵן אֶצְעַק חָמָס, וְלֹא אֵעָנֶה;    אֲשַׁוַּע, וְאֵין מִשְׁפָּט.
יט,ח  אָרְחִי גָדַר, וְלֹא אֶעֱבוֹר;    וְעַל נְתִיבוֹתַי, חֹשֶׁךְ יָשִׂים.
יט,ט  כְּבוֹדִי, מֵעָלַי הִפְשִׁיט;    וַיָּסַר, עֲטֶרֶת רֹאשִׁי.
יט,י  יִתְּצֵנִי סָבִיב, וָאֵלַךְ;    וַיַּסַּע כָּעֵץ, תִּקְוָתִי.
יט,יא  וַיַּחַר עָלַי אַפּוֹ;    וַיַּחְשְׁבֵנִי לוֹ כְצָרָיו.
יט,יב  יַחַד, יָבֹאוּ גְדוּדָיו--וַיָּסֹלּוּ עָלַי דַּרְכָּם;    וַיַּחֲנוּ סָבִיב לְאָהֳלִי.
יט,יג  אַחַי, מֵעָלַי הִרְחִיק;    וְיֹדְעַי, אַךְ-זָרוּ מִמֶּנִּי.
יט,יד  חָדְלוּ קְרוֹבָי;    וּמְיֻדָּעַי שְׁכֵחוּנִי.
יט,טו  גָּרֵי בֵיתִי וְאַמְהֹתַי, לְזָר תַּחְשְׁבֻנִי;    נָכְרִי, הָיִיתִי בְעֵינֵיהֶם.
יט,טז  לְעַבְדִּי קָרָאתִי, וְלֹא יַעֲנֶה;    בְּמוֹ-פִי, אֶתְחַנֶּן-לוֹ.
יט,יז  רוּחִי, זָרָה לְאִשְׁתִּי;    וְחַנֹּתִי, לִבְנֵי בִטְנִי.
יט,יח  גַּם-עֲוִילִים, מָאֲסוּ בִי;    אָקוּמָה, וַיְדַבְּרוּ-בִי.
יט,יט  תִּעֲבוּנִי, כָּל-מְתֵי סוֹדִי;    וְזֶה-אָהַבְתִּי, נֶהְפְּכוּ-בִי.
יט,כ  בְּעוֹרִי וּבִבְשָׂרִי, דָּבְקָה עַצְמִי;    וָאֶתְמַלְּטָה, בְּעוֹר שִׁנָּי.
יט,כא  חָנֻּנִי חָנֻּנִי אַתֶּם רֵעָי:    כִּי יַד-אֱלוֹהַּ, נָגְעָה בִּי.
יט,כב  לָמָּה, תִּרְדְּפֻנִי כְמוֹ-אֵל;    וּמִבְּשָׂרִי, לֹא תִשְׂבָּעוּ.
יט,כג  מִי-יִתֵּן אֵפוֹ, וְיִכָּתְבוּן מִלָּי:    מִי-יִתֵּן בַּסֵּפֶר וְיֻחָקוּ.
יט,כד  בְּעֵט-בַּרְזֶל וְעֹפָרֶת--    לָעַד, בַּצּוּר יֵחָצְבוּן.
יט,כה  וַאֲנִי יָדַעְתִּי, גֹּאֲלִי חָי;    וְאַחֲרוֹן, עַל-עָפָר יָקוּם.
יט,כו  וְאַחַר עוֹרִי, נִקְּפוּ-זֹאת;    וּמִבְּשָׂרִי, אֶחֱזֶה אֱלוֹהַּ.
יט,כז  אֲשֶׁר אֲנִי, אֶחֱזֶה-לִּי--וְעֵינַי רָאוּ וְלֹא-זָר:    כָּלוּ כִלְיֹתַי בְּחֵקִי.
יט,כח  כִּי תֹאמְרוּ, מַה-נִּרְדָּף-לוֹ;    וְשֹׁרֶשׁ דָּבָר, נִמְצָא-בִי.
יט,כט  גּוּרוּ לָכֶם, מִפְּנֵי-חֶרֶב--כִּי-חֵמָה, עֲו‍ֹנוֹת חָרֶב:    לְמַעַן תֵּדְעוּן שדין (שַׁדּוּן).
כ,א                  וַיַּעַן, צֹפַר הַנַּעֲמָתִי; וַיֹּאמַר.
כ,ב  לָכֵן, שְׂעִפַּי יְשִׁיבוּנִי;    וּבַעֲבוּר, חוּשִׁי בִי.
כ,ג  מוּסַר כְּלִמָּתִי אֶשְׁמָע;    וְרוּחַ, מִבִּינָתִי יַעֲנֵנִי.
כ,ד  הֲזֹאת יָדַעְתָּ, מִנִּי-עַד;    מִנִּי שִׂים אָדָם עֲלֵי-אָרֶץ.
כ,ה  כִּי רִנְנַת רְשָׁעִים, מִקָּרוֹב;    וְשִׂמְחַת חָנֵף עֲדֵי-רָגַע.
כ,ו  אִם-יַעֲלֶה לַשָּׁמַיִם שִׂיאוֹ;    וְרֹאשׁוֹ, לָעָב יַגִּיעַ.
כ,ז  כְּגֶלְלוֹ, לָנֶצַח יֹאבֵד;    רֹאָיו, יֹאמְרוּ אַיּוֹ.
כ,ח  כַּחֲלוֹם יָעוּף, וְלֹא יִמְצָאֻהוּ;    וְיֻדַּד, כְּחֶזְיוֹן לָיְלָה.
כ,ט  עַיִן שְׁזָפַתּוּ, וְלֹא תוֹסִיף;    וְלֹא-עוֹד, תְּשׁוּרֶנּוּ מְקוֹמוֹ.
כ,י  בָּנָיו, יְרַצּוּ דַלִּים;    וְיָדָיו, תָּשֵׁבְנָה אוֹנוֹ.
כ,יא  עַצְמוֹתָיו, מָלְאוּ עֲלוּמָו;    וְעִמּוֹ, עַל-עָפָר תִּשְׁכָּב.
כ,יב  אִם-תַּמְתִּיק בְּפִיו רָעָה--    יַכְחִידֶנָּה, תַּחַת לְשֹׁנוֹ.
כ,יג  יַחְמֹל עָלֶיהָ, וְלֹא יַעַזְבֶנָּה;    וְיִמְנָעֶנָּה, בְּתוֹךְ חִכּוֹ.
כ,יד  לַחְמוֹ, בְּמֵעָיו נֶהְפָּךְ;    מְרוֹרַת פְּתָנִים בְּקִרְבּוֹ.
כ,טו  חַיִל בָּלַע, וַיְקִאֶנּוּ;    מִבִּטְנוֹ, יֹרִשֶׁנּוּ אֵל.
כ,טז  רֹאשׁ-פְּתָנִים יִינָק;    תַּהַרְגֵהוּ, לְשׁוֹן אֶפְעֶה.
כ,יז  אַל-יֵרֶא בִפְלַגּוֹת--    נַהֲרֵי נַחֲלֵי, דְּבַשׁ וְחֶמְאָה.
כ,יח  מֵשִׁיב יָגָע, וְלֹא יִבְלָע;    כְּחֵיל תְּמוּרָתוֹ, וְלֹא יַעֲלֹס.
כ,יט  כִּי-רִצַּץ, עָזַב דַּלִּים;    בַּיִת גָּזַל, וְלֹא יִבְנֵהוּ.
כ,כ  כִּי, לֹא-יָדַע שָׁלֵו בְּבִטְנוֹ;    בַּחֲמוּדוֹ, לֹא יְמַלֵּט.
כ,כא  אֵין-שָׂרִיד לְאָכְלוֹ;    עַל-כֵּן, לֹא-יָחִיל טוּבוֹ.
כ,כב  בִּמְלֹאות שִׂפְקוֹ, יֵצֶר לוֹ;    כָּל-יַד עָמֵל תְּבֹאֶנּוּ.
כ,כג  יְהִי, לְמַלֵּא בִטְנוֹ--יְשַׁלַּח-בּוֹ, חֲרוֹן אַפּוֹ;    וְיַמְטֵר עָלֵימוֹ, בִּלְחוּמוֹ.
כ,כד  יִבְרַח, מִנֵּשֶׁק בַּרְזֶל;    תַּחְלְפֵהוּ, קֶשֶׁת נְחוּשָׁה.
כ,כה  שָׁלַף, וַיֵּצֵא מִגֵּוָה:    וּבָרָק, מִמְּרֹרָתוֹ יַהֲלֹךְ; עָלָיו אֵמִים.
כ,כו  כָּל-חֹשֶׁךְ,    טָמוּן לִצְפּוּנָיו:
תְּאָכְלֵהוּ, אֵשׁ לֹא-נֻפָּח;    יֵרַע שָׂרִיד בְּאָהֳלוֹ.
כ,כז  יְגַלּוּ שָׁמַיִם עֲו‍ֹנוֹ;    וְאֶרֶץ, מִתְקוֹמָמָה לוֹ.
כ,כח  יִגֶל, יְבוּל בֵּיתוֹ;    נִגָּרוֹת, בְּיוֹם אַפּוֹ.
כ,כט  זֶה, חֵלֶק-אָדָם רָשָׁע--מֵאֱלֹהִים;    וְנַחֲלַת אִמְרוֹ מֵאֵל.
כא,א                  וַיַּעַן אִיּוֹב, וַיֹּאמַר.
כא,ב  שִׁמְעוּ שָׁמוֹעַ, מִלָּתִי;    וּתְהִי-זֹאת, תַּנְחוּמֹתֵיכֶם.
כא,ג  שָׂאוּנִי, וְאָנֹכִי אֲדַבֵּר;    וְאַחַר דַּבְּרִי תַלְעִיג.
כא,ד  הֶאָנֹכִי, לְאָדָם שִׂיחִי;    וְאִם-מַדּוּעַ, לֹא-תִקְצַר רוּחִי.
כא,ה  פְּנוּ-אֵלַי וְהָשַׁמּוּ;    וְשִׂימוּ יָד עַל-פֶּה.
כא,ו  וְאִם-זָכַרְתִּי וְנִבְהָלְתִּי;    וְאָחַז בְּשָׂרִי, פַּלָּצוּת.
כא,ז  מַדּוּעַ, רְשָׁעִים יִחְיוּ;    עָתְקוּ, גַּם-גָּבְרוּ חָיִל.
כא,ח  זַרְעָם נָכוֹן לִפְנֵיהֶם עִמָּם;    וְצֶאֱצָאֵיהֶם, לְעֵינֵיהֶם.
כא,ט  בָּתֵּיהֶם שָׁלוֹם מִפָּחַד;    וְלֹא שֵׁבֶט אֱלוֹהַּ עֲלֵיהֶם.
כא,י  שׁוֹרוֹ עִבַּר, וְלֹא יַגְעִל;    תְּפַלֵּט פָּרָתוֹ, וְלֹא תְשַׁכֵּל.
כא,יא  יְשַׁלְּחוּ כַצֹּאן, עֲוִילֵיהֶם;    וְיַלְדֵיהֶם, יְרַקֵּדוּן.
כא,יב  יִשְׂאוּ, כְּתֹף וְכִנּוֹר;    וְיִשְׂמְחוּ, לְקוֹל עוּגָב.
כא,יג  יבלו (יְכַלּוּ) בַטּוֹב יְמֵיהֶם;    וּבְרֶגַע, שְׁאוֹל יֵחָתּוּ.
כא,יד  וַיֹּאמְרוּ לָאֵל, סוּר מִמֶּנּוּ;    וְדַעַת דְּרָכֶיךָ, לֹא חָפָצְנוּ.
כא,טו  מַה-שַּׁדַּי כִּי-נַעַבְדֶנּוּ;    וּמַה-נּוֹעִיל, כִּי נִפְגַּע-בּוֹ.
כא,טז  הֵן לֹא בְיָדָם טוּבָם;    עֲצַת רְשָׁעִים, רָחֲקָה מֶנִּי.
כא,יז  כַּמָּה, נֵר-רְשָׁעִים יִדְעָךְ--    וְיָבֹא עָלֵימוֹ אֵידָם;
חֲבָלִים,    יְחַלֵּק בְּאַפּוֹ.
כא,יח  יִהְיוּ, כְּתֶבֶן לִפְנֵי-רוּחַ;    וּכְמֹץ, גְּנָבַתּוּ סוּפָה.
כא,יט  אֱלוֹהַּ, יִצְפֹּן-לְבָנָיו אוֹנוֹ;    יְשַׁלֵּם אֵלָיו וְיֵדָע.
כא,כ  יִרְאוּ עֵינָו כִּידוֹ;    וּמֵחֲמַת שַׁדַּי יִשְׁתֶּה.
כא,כא  כִּי מַה-חֶפְצוֹ בְּבֵיתוֹ אַחֲרָיו;    וּמִסְפַּר חֳדָשָׁיו חֻצָּצוּ.
כא,כב  הַלְאֵל יְלַמֶּד-דָּעַת;    וְהוּא, רָמִים יִשְׁפּוֹט.
כא,כג  זֶה--יָמוּת, בְּעֶצֶם תֻּמּוֹ;    כֻּלּוֹ, שַׁלְאֲנַן וְשָׁלֵיו.
כא,כד  עֲטִינָיו, מָלְאוּ חָלָב;    וּמֹחַ עַצְמוֹתָיו יְשֻׁקֶּה.
כא,כה  וְזֶה--יָמוּת, בְּנֶפֶשׁ מָרָה;    וְלֹא-אָכַל, בַּטּוֹבָה.
כא,כו  יַחַד, עַל-עָפָר יִשְׁכָּבוּ;    וְרִמָּה, תְּכַסֶּה עֲלֵיהֶם.
כא,כז  הֵן יָדַעְתִּי, מַחְשְׁבוֹתֵיכֶם;    וּמְזִמּוֹת, עָלַי תַּחְמֹסוּ.
כא,כח  כִּי תֹאמְרוּ, אַיֵּה בֵית-נָדִיב;    וְאַיֵּה, אֹהֶל מִשְׁכְּנוֹת רְשָׁעִים.
כא,כט  הֲלֹא שְׁאֶלְתֶּם, עוֹבְרֵי דָרֶךְ;    וְאֹתֹתָם, לֹא תְנַכֵּרוּ.
כא,ל  כִּי לְיוֹם אֵיד, יֵחָשֶׂךְ רָע;    לְיוֹם עֲבָרוֹת יוּבָלוּ.
כא,לא  מִי-יַגִּיד עַל-פָּנָיו דַּרְכּוֹ;    וְהוּא-עָשָׂה, מִי יְשַׁלֶּם-לוֹ.
כא,לב  וְהוּא, לִקְבָרוֹת יוּבָל;    וְעַל-גָּדִישׁ יִשְׁקוֹד.
כא,לג  מָתְקוּ-לוֹ, רִגְבֵי-נָחַל:    וְאַחֲרָיו, כָּל-אָדָם יִמְשׁוֹךְ; וּלְפָנָיו, אֵין מִסְפָּר.
כא,לד  וְאֵיךְ, תְּנַחֲמוּנִי הָבֶל;    וּתְשׁוּבֹתֵיכֶם, נִשְׁאַר-מָעַל.
כב,א                  וַיַּעַן, אֱלִיפַז הַתֵּמָנִי; וַיֹּאמַר.
כב,ב  הַלְאֵל יִסְכָּן-גָּבֶר--    כִּי-יִסְכֹּן עָלֵימוֹ מַשְׂכִּיל.
כב,ג  הַחֵפֶץ לְשַׁדַּי, כִּי תִצְדָּק;    וְאִם-בֶּצַע, כִּי-תַתֵּם דְּרָכֶיךָ.
כב,ד  הֲמִיִּרְאָתְךָ יֹכִיחֶךָ;    יָבוֹא עִמְּךָ, בַּמִּשְׁפָּט.
כב,ה  הֲלֹא רָעָתְךָ רַבָּה;    וְאֵין-קֵץ, לַעֲו‍ֹנֹתֶיךָ.
כב,ו  כִּי-תַחְבֹּל אַחֶיךָ חִנָּם;    וּבִגְדֵי עֲרוּמִּים תַּפְשִׁיט.
כב,ז  לֹא-מַיִם, עָיֵף תַּשְׁקֶה;    וּמֵרָעֵב, תִּמְנַע-לָחֶם.
כב,ח  וְאִישׁ זְרוֹעַ, לוֹ הָאָרֶץ;    וּנְשׂוּא פָנִים, יֵשֶׁב בָּהּ.
כב,ט  אַלְמָנוֹת, שִׁלַּחְתָּ רֵיקָם;    וּזְרֹעוֹת יְתֹמִים יְדֻכָּא.
כב,י  עַל-כֵּן, סְבִיבוֹתֶיךָ פַחִים;    וִיבַהֶלְךָ, פַּחַד פִּתְאֹם.
כב,יא  אוֹ-חֹשֶׁךְ לֹא-תִרְאֶה;    וְשִׁפְעַת-מַיִם תְּכַסֶּךָּ.
כב,יב  הֲלֹא-אֱלוֹהַּ, גֹּבַהּ שָׁמָיִם;    וּרְאֵה רֹאשׁ כּוֹכָבִים כִּי-רָמּוּ.
כב,יג  וְאָמַרְתָּ, מַה-יָּדַע אֵל;    הַבְעַד עֲרָפֶל יִשְׁפּוֹט.
כב,יד  עָבִים סֵתֶר-לוֹ, וְלֹא יִרְאֶה;    וְחוּג שָׁמַיִם, יִתְהַלָּךְ.
כב,טו  הַאֹרַח עוֹלָם תִּשְׁמוֹר--    אֲשֶׁר דָּרְכוּ מְתֵי-אָוֶן.
כב,טז  אֲשֶׁר-קֻמְּטוּ וְלֹא-עֵת;    נָהָר, יוּצַק יְסוֹדָם.
כב,יז  הָאֹמְרִים לָאֵל, סוּר מִמֶּנּוּ;    וּמַה-יִּפְעַל שַׁדַּי לָמוֹ.
כב,יח  וְהוּא מִלֵּא בָתֵּיהֶם טוֹב;    וַעֲצַת רְשָׁעִים, רָחֲקָה מֶנִּי.
כב,יט  יִרְאוּ צַדִּיקִים וְיִשְׂמָחוּ;    וְנָקִי, יִלְעַג-לָמוֹ.
כב,כ  אִם-לֹא נִכְחַד קִימָנוּ;    וְיִתְרָם, אָכְלָה אֵשׁ.
כב,כא  הַסְכֶּן-נָא עִמּוֹ וּשְׁלָם;    בָּהֶם, תְּבוֹאַתְךָ טוֹבָה.
כב,כב  קַח-נָא מִפִּיו תּוֹרָה;    וְשִׂים אֲמָרָיו, בִּלְבָבֶךָ.
כב,כג  אִם-תָּשׁוּב עַד-שַׁדַּי, תִּבָּנֶה;    תַּרְחִיק עַוְלָה, מֵאָהֳלֶךָ.
כב,כד  וְשִׁית-עַל-עָפָר בָּצֶר;    וּכְצוּר נְחָלִים אוֹפִיר.
כב,כה  וְהָיָה שַׁדַּי בְּצָרֶיךָ;    וְכֶסֶף תּוֹעָפוֹת לָךְ.
כב,כו  כִּי-אָז, עַל-שַׁדַּי תִּתְעַנָּג;    וְתִשָּׂא אֶל-אֱלוֹהַּ פָּנֶיךָ.
כב,כז  תַּעְתִּיר אֵלָיו, וְיִשְׁמָעֶךָּ;    וּנְדָרֶיךָ תְשַׁלֵּם.
כב,כח  וְתִגְזַר-אֹמֶר, וְיָקָם לָךְ;    וְעַל-דְּרָכֶיךָ, נָגַהּ אוֹר.
כב,כט  כִּי-הִשְׁפִּילוּ, וַתֹּאמֶר גֵּוָה;    וְשַׁח עֵינַיִם יוֹשִׁעַ.
כב,ל  יְמַלֵּט אִי-נָקִי;    וְנִמְלַט, בְּבֹר כַּפֶּיךָ.
כג,א                  וַיַּעַן אִיּוֹב, וַיֹּאמַר.
כג,ב  גַּם-הַיּוֹם, מְרִי שִׂחִי;    יָדִי, כָּבְדָה עַל-אַנְחָתִי.
כג,ג  מִי-יִתֵּן יָדַעְתִּי, וְאֶמְצָאֵהוּ;    אָבוֹא, עַד-תְּכוּנָתוֹ.
כג,ד  אֶעֶרְכָה לְפָנָיו מִשְׁפָּט;    וּפִי, אֲמַלֵּא תוֹכָחוֹת.
כג,ה  אֵדְעָה, מִלִּים יַעֲנֵנִי;    וְאָבִינָה, מַה-יֹּאמַר לִי.
כג,ו  הַבְּרָב-כֹּחַ, יָרִיב עִמָּדִי;    לֹא אַךְ-הוּא, יָשִׂם בִּי.
כג,ז  שָׁם--יָשָׁר, נוֹכָח עִמּוֹ;    וַאֲפַלְּטָה לָנֶצַח, מִשֹּׁפְטִי.
כג,ח  הֵן קֶדֶם אֶהֱלֹךְ וְאֵינֶנּוּ;    וְאָחוֹר, וְלֹא-אָבִין לוֹ.
כג,ט  שְׂמֹאול בַּעֲשֹׂתוֹ, וְלֹא-אָחַז;    יַעְטֹף יָמִין, וְלֹא אֶרְאֶה.
כג,י  כִּי-יָדַע, דֶּרֶךְ עִמָּדִי;    בְּחָנַנִי, כַּזָּהָב אֵצֵא.
כג,יא  בַּאֲשֻׁרוֹ, אָחֲזָה רַגְלִי;    דַּרְכּוֹ שָׁמַרְתִּי וְלֹא-אָט.
כג,יב  מִצְוַת שְׂפָתָיו, וְלֹא אָמִישׁ;    מֵחֻקִּי, צָפַנְתִּי אִמְרֵי-פִיו.
כג,יג  וְהוּא בְאֶחָד, וּמִי יְשִׁיבֶנּוּ;    וְנַפְשׁוֹ אִוְּתָה וַיָּעַשׂ.
כג,יד  כִּי, יַשְׁלִים חֻקִּי;    וְכָהֵנָּה רַבּוֹת עִמּוֹ.
כג,טו  עַל-כֵּן, מִפָּנָיו אֶבָּהֵל;    אֶתְבּוֹנֵן, וְאֶפְחַד מִמֶּנּוּ.
כג,טז  וְאֵל, הֵרַךְ לִבִּי;    וְשַׁדַּי, הִבְהִילָנִי.
כג,יז  כִּי-לֹא נִצְמַתִּי, מִפְּנֵי-חֹשֶׁךְ;    וּמִפָּנַי, כִּסָּה-אֹפֶל.
כד,א  מַדּוּעַ--מִשַּׁדַּי, לֹא-נִצְפְּנוּ עִתִּים;    וְיֹדְעָו, לֹא-חָזוּ יָמָיו.
כד,ב  גְּבֻלוֹת יַשִּׂיגוּ;    עֵדֶר גָּזְלוּ, וַיִּרְעוּ.
כד,ג  חֲמוֹר יְתוֹמִים יִנְהָגוּ;    יַחְבְּלוּ, שׁוֹר אַלְמָנָה.
כד,ד  יַטּוּ אֶבְיֹנִים מִדָּרֶךְ;    יַחַד חֻבְּאוּ, עֲנִיֵּי-אָרֶץ.
כד,ה  הֵן פְּרָאִים, בַּמִּדְבָּר--    יָצְאוּ בְּפָעֳלָם, מְשַׁחֲרֵי לַטָּרֶף;
עֲרָבָה לוֹ לֶחֶם,    לַנְּעָרִים.
כד,ו  בַּשָּׂדֶה, בְּלִילוֹ יקצירו (יִקְצוֹרוּ);    וְכֶרֶם רָשָׁע יְלַקֵּשׁוּ.
כד,ז  עָרוֹם יָלִינוּ, מִבְּלִי לְבוּשׁ;    וְאֵין כְּסוּת, בַּקָּרָה.
כד,ח  מִזֶּרֶם הָרִים יִרְטָבוּ;    וּמִבְּלִי מַחְסֶה, חִבְּקוּ-צוּר.
כד,ט  יִגְזְלוּ, מִשֹּׁד יָתוֹם;    וְעַל-עָנִי יַחְבֹּלוּ.
כד,י  עָרוֹם הִלְּכוּ, בְּלִי לְבוּשׁ;    וּרְעֵבִים, נָשְׂאוּ עֹמֶר.
כד,יא  בֵּין-שׁוּרֹתָם יַצְהִירוּ;    יְקָבִים דָּרְכוּ, וַיִּצְמָאוּ.
כד,יב  מֵעִיר מְתִים, יִנְאָקוּ--    וְנֶפֶשׁ-חֲלָלִים תְּשַׁוֵּעַ:
וֶאֱלוֹהַּ,    לֹא-יָשִׂים תִּפְלָה.
כד,יג  הֵמָּה, הָיוּ--בְּמֹרְדֵי-אוֹר:    לֹא-הִכִּירוּ דְרָכָיו; וְלֹא יָשְׁבוּ, בִּנְתִיבֹתָיו.
כד,יד  לָאוֹר, יָקוּם רוֹצֵחַ--יִקְטָל-עָנִי וְאֶבְיוֹן;    וּבַלַּיְלָה, יְהִי כַגַּנָּב.
כד,טו  וְעֵין נֹאֵף, שָׁמְרָה נֶשֶׁף לֵאמֹר--    לֹא-תְשׁוּרֵנִי עָיִן;
וְסֵתֶר פָּנִים    יָשִׂים.
כד,טז  חָתַר בַּחֹשֶׁךְ, בָּתִּים:    יוֹמָם חִתְּמוּ-לָמוֹ; לֹא-יָדְעוּ אוֹר.
כד,יז  כִּי יַחְדָּו, בֹּקֶר לָמוֹ צַלְמָוֶת;    כִּי-יַכִּיר, בַּלְהוֹת צַלְמָוֶת.
כד,יח  קַל-הוּא, עַל-פְּנֵי-מַיִם--    תְּקֻלַּל חֶלְקָתָם בָּאָרֶץ;
לֹא-יִפְנֶה,    דֶּרֶךְ כְּרָמִים.
כד,יט  צִיָּה גַם-חֹם, יִגְזְלוּ מֵימֵי-שֶׁלֶג;    שְׁאוֹל חָטָאוּ.
כד,כ  יִשְׁכָּחֵהוּ רֶחֶם, מְתָקוֹ רִמָּה--    עוֹד לֹא-יִזָּכֵר;
וַתִּשָּׁבֵר כָּעֵץ    עַוְלָה.
כד,כא  רֹעֶה עֲקָרָה, לֹא תֵלֵד;    וְאַלְמָנָה, לֹא יְיֵטִיב.
כד,כב  וּמָשַׁךְ אַבִּירִים בְּכֹחוֹ;    יָקוּם, וְלֹא-יַאֲמִין בַּחַיִּין.
כד,כג  יִתֶּן-לוֹ לָבֶטַח, וְיִשָּׁעֵן;    וְעֵינֵיהוּ, עַל-דַּרְכֵיהֶם.
כד,כד  רוֹמּוּ מְּעַט, וְאֵינֶנּוּ,    וְהֻמְּכוּ, כַּכֹּל יִקָּפְצוּן;
וּכְרֹאשׁ שִׁבֹּלֶת    יִמָּלוּ.
כד,כה  וְאִם-לֹא אֵפוֹ, מִי יַכְזִיבֵנִי;    וְיָשֵׂם לְאַל, מִלָּתִי.
כה,א                  וַיַּעַן, בִּלְדַּד הַשֻּׁחִי; וַיֹּאמַר.
כה,ב  הַמְשֵׁל וָפַחַד עִמּוֹ;    עֹשֶׂה שָׁלוֹם, בִּמְרוֹמָיו.
כה,ג  הֲיֵשׁ מִסְפָּר, לִגְדוּדָיו;    וְעַל-מִי, לֹא-יָקוּם אוֹרֵהוּ.
כה,ד  וּמַה-יִּצְדַּק אֱנוֹשׁ עִם-אֵל;    וּמַה-יִּזְכֶּה, יְלוּד אִשָּׁה.
כה,ה  הֵן עַד-יָרֵחַ, וְלֹא יַאֲהִיל;    וְכוֹכָבִים, לֹא-זַכּוּ בְעֵינָיו.
כה,ו  אַף, כִּי-אֱנוֹשׁ רִמָּה;    וּבֶן-אָדָם, תּוֹלֵעָה.
כו,א                  וַיַּעַן אִיּוֹב, וַיֹּאמַר.
כו,ב  מֶה-עָזַרְתָּ, לְלֹא-כֹחַ;    הוֹשַׁעְתָּ, זְרוֹעַ לֹא-עֹז.
כו,ג  מַה-יָּעַצְתָּ, לְלֹא חָכְמָה;    וְתֻשִׁיָּה, לָרֹב הוֹדָעְתָּ.
כו,ד  אֶת-מִי, הִגַּדְתָּ מִלִּין;    וְנִשְׁמַת-מִי, יָצְאָה מִמֶּךָּ.
כו,ה  הָרְפָאִים יְחוֹלָלוּ--    מִתַּחַת מַיִם, וְשֹׁכְנֵיהֶם.
כו,ו  עָרוֹם שְׁאוֹל נֶגְדּוֹ;    וְאֵין כְּסוּת, לָאֲבַדּוֹן.
כו,ז  נֹטֶה צָפוֹן עַל-תֹּהוּ;    תֹּלֶה אֶרֶץ, עַל-בְּלִי-מָה.
כו,ח  צֹרֵר-מַיִם בְּעָבָיו;    וְלֹא-נִבְקַע עָנָן תַּחְתָּם.
כו,ט  מְאַחֵז פְּנֵי-כִסֵּה;    פַּרְשֵׁז עָלָיו עֲנָנוֹ.
כו,י  חֹק-חָג, עַל-פְּנֵי-מָיִם--    עַד-תַּכְלִית אוֹר עִם-חֹשֶׁךְ.
כו,יא  עַמּוּדֵי שָׁמַיִם יְרוֹפָפוּ;    וְיִתְמְהוּ, מִגַּעֲרָתוֹ.
כו,יב  בְּכֹחוֹ, רָגַע הַיָּם;    ובתובנתו (וּבִתְבוּנָתוֹ), מָחַץ רָהַב.
כו,יג  בְּרוּחוֹ, שָׁמַיִם שִׁפְרָה;    חֹלְלָה יָדוֹ, נָחָשׁ בָּרִחַ.
כו,יד  הֶן-אֵלֶּה, קְצוֹת דְּרָכָו--    וּמַה-שֵּׁמֶץ דָּבָר, נִשְׁמַע-בּוֹ;
וְרַעַם גְּבוּרֹתָו,    מִי יִתְבּוֹנָן.
כז,א                  וַיֹּסֶף אִיּוֹב, שְׂאֵת מְשָׁלוֹ; וַיֹּאמַר.
כז,ב  חַי-אֵל, הֵסִיר מִשְׁפָּטִי;    וְשַׁדַּי, הֵמַר נַפְשִׁי.
כז,ג  כִּי-כָל-עוֹד נִשְׁמָתִי בִי;    וְרוּחַ אֱלוֹהַּ בְּאַפִּי.
כז,ד  אִם-תְּדַבֵּרְנָה שְׂפָתַי עַוְלָה;    וּלְשׁוֹנִי, אִם-יֶהְגֶּה רְמִיָּה.
כז,ה  חָלִילָה לִּי,    אִם-אַצְדִּיק אֶתְכֶם:
עַד-אֶגְוָע--    לֹא-אָסִיר תֻּמָּתִי מִמֶּנִּי.
כז,ו  בְּצִדְקָתִי הֶחֱזַקְתִּי, וְלֹא אַרְפֶּהָ;    לֹא-יֶחֱרַף לְבָבִי, מִיָּמָי.
כז,ז  יְהִי כְרָשָׁע, אֹיְבִי;    וּמִתְקוֹמְמִי כְעַוָּל.
כז,ח  כִּי מַה-תִּקְוַת חָנֵף, כִּי יִבְצָע;    כִּי יֵשֶׁל אֱלוֹהַּ נַפְשׁוֹ.
כז,ט  הֲצַעֲקָתוֹ, יִשְׁמַע אֵל--    כִּי-תָבוֹא עָלָיו צָרָה.
כז,י  אִם-עַל-שַׁדַּי יִתְעַנָּג;    יִקְרָא אֱלוֹהַּ בְּכָל-עֵת.
כז,יא  אוֹרֶה אֶתְכֶם בְּיַד-אֵל;    אֲשֶׁר עִם-שַׁדַּי, לֹא אֲכַחֵד.
כז,יב  הֵן-אַתֶּם כֻּלְּכֶם חֲזִיתֶם;    וְלָמָּה-זֶּה, הֶבֶל תֶּהְבָּלוּ.
כז,יג  זֶה, חֵלֶק-אָדָם רָשָׁע עִם-אֵל;    וְנַחֲלַת עָרִיצִים, מִשַּׁדַּי יִקָּחוּ.
כז,יד  אִם-יִרְבּוּ בָנָיו לְמוֹ-חָרֶב;    וְצֶאֱצָאָיו, לֹא יִשְׂבְּעוּ-לָחֶם.
כז,טו  שְׂרִידָו, בַּמָּוֶת יִקָּבֵרוּ;    וְאַלְמְנֹתָיו, לֹא תִבְכֶּינָה.
כז,טז  אִם-יִצְבֹּר כֶּעָפָר כָּסֶף;    וְכַחֹמֶר, יָכִין מַלְבּוּשׁ.
כז,יז  יָכִין, וְצַדִּיק יִלְבָּשׁ;    וְכֶסֶף, נָקִי יַחֲלֹק.
כז,יח  בָּנָה כָעָשׁ בֵּיתוֹ;    וּכְסֻכָּה, עָשָׂה נֹצֵר.
כז,יט  עָשִׁיר יִשְׁכַּב, וְלֹא יֵאָסֵף;    עֵינָיו פָּקַח וְאֵינֶנּוּ.
כז,כ  תַּשִּׂיגֵהוּ כַמַּיִם, בַּלָּהוֹת;    לַיְלָה, גְּנָבַתּוּ סוּפָה.
כז,כא  יִשָּׂאֵהוּ קָדִים וְיֵלַךְ;    וִישָׂעֲרֵהוּ, מִמְּקֹמוֹ.
כז,כב  וְיַשְׁלֵךְ עָלָיו, וְלֹא יַחְמֹל;    מִיָּדוֹ, בָּרוֹחַ יִבְרָח.
כז,כג  יִשְׂפֹּק עָלֵימוֹ כַפֵּימוֹ;    וְיִשְׁרֹק עָלָיו, מִמְּקֹמוֹ.
כח,א  כִּי יֵשׁ לַכֶּסֶף מוֹצָא;    וּמָקוֹם, לַזָּהָב יָזֹקּוּ.
כח,ב  בַּרְזֶל, מֵעָפָר יֻקָּח;    וְאֶבֶן, יָצוּק נְחוּשָׁה.
כח,ג  קֵץ, שָׂם לַחֹשֶׁךְ, וּלְכָל-תַּכְלִית, הוּא חוֹקֵר:    אֶבֶן אֹפֶל וְצַלְמָוֶת.
כח,ד  פָּרַץ נַחַל, מֵעִם-גָּר--הַנִּשְׁכָּחִים מִנִּי-רָגֶל;    דַּלּוּ מֵאֱנוֹשׁ נָעוּ.
כח,ה  אֶרֶץ--מִמֶּנָּה יֵצֵא-לָחֶם;    וְתַחְתֶּיהָ, נֶהְפַּךְ כְּמוֹ-אֵשׁ.
כח,ו  מְקוֹם-סַפִּיר אֲבָנֶיהָ;    וְעַפְרֹת זָהָב לוֹ.
כח,ז  נָתִיב, לֹא-יְדָעוֹ עָיִט;    וְלֹא שְׁזָפַתּוּ, עֵין אַיָּה.
כח,ח  לֹא-הִדְרִיכוּהוּ בְנֵי-שָׁחַץ;    לֹא-עָדָה עָלָיו שָׁחַל.
כח,ט  בַּחַלָּמִישׁ, שָׁלַח יָדוֹ;    הָפַךְ מִשֹּׁרֶשׁ הָרִים.
כח,י  בַּצּוּרוֹת, יְאֹרִים בִּקֵּעַ;    וְכָל-יְקָר, רָאֲתָה עֵינוֹ.
כח,יא  מִבְּכִי, נְהָרוֹת חִבֵּשׁ;    וְתַעֲלֻמָהּ, יֹצִא אוֹר.

כח,יב  וְהַחָכְמָה, מֵאַיִן תִּמָּצֵא;    וְאֵי זֶה, מְקוֹם בִּינָה.
כח,יג  לֹא-יָדַע אֱנוֹשׁ עֶרְכָּהּ;    וְלֹא תִמָּצֵא, בְּאֶרֶץ הַחַיִּים.
כח,יד  תְּהוֹם אָמַר, לֹא בִי-הִיא;    וְיָם אָמַר, אֵין עִמָּדִי.
כח,טו  לֹא-יֻתַּן סְגוֹר תַּחְתֶּיהָ;    וְלֹא יִשָּׁקֵל, כֶּסֶף מְחִירָהּ.
כח,טז  לֹא-תְסֻלֶּה, בְּכֶתֶם אוֹפִיר;    בְּשֹׁהַם יָקָר וְסַפִּיר.
כח,יז  לֹא-יַעַרְכֶנָּה זָהָב, וּזְכוֹכִית;    וּתְמוּרָתָהּ כְּלִי-פָז.
כח,יח  רָאמוֹת וְגָבִישׁ, לֹא יִזָּכֵר;    וּמֶשֶׁךְ חָכְמָה, מִפְּנִינִים.
כח,יט  לֹא-יַעַרְכֶנָּה, פִּטְדַת-כּוּשׁ;    בְּכֶתֶם טָהוֹר, לֹא תְסֻלֶּה.
כח,כ  וְהַחָכְמָה, מֵאַיִן תָּבוֹא;    וְאֵי זֶה, מְקוֹם בִּינָה.
כח,כא  וְנֶעֶלְמָה, מֵעֵינֵי כָל-חָי;    וּמֵעוֹף הַשָּׁמַיִם נִסְתָּרָה.
כח,כב  אֲבַדּוֹן וָמָוֶת, אָמְרוּ;    בְּאָזְנֵינוּ, שָׁמַעְנוּ שִׁמְעָהּ.
כח,כג  אֱלֹהִים, הֵבִין דַּרְכָּהּ;    וְהוּא, יָדַע אֶת-מְקוֹמָהּ.
כח,כד  כִּי-הוּא, לִקְצוֹת-הָאָרֶץ יַבִּיט;    תַּחַת כָּל-הַשָּׁמַיִם יִרְאֶה.
כח,כה  לַעֲשׂוֹת לָרוּחַ מִשְׁקָל;    וּמַיִם, תִּכֵּן בְּמִדָּה.
כח,כו  בַּעֲשׂתוֹ לַמָּטָר חֹק;    וְדֶרֶךְ, לַחֲזִיז קֹלוֹת.
כח,כז  אָז רָאָהּ, וַיְסַפְּרָהּ;    הֱכִינָהּ, וְגַם-חֲקָרָהּ.
כח,כח  וַיֹּאמֶר, לָאָדָם--הֵן יִרְאַת אֲדֹנָי, הִיא חָכְמָה;    וְסוּר מֵרָע בִּינָה.
כט,א                  וַיֹּסֶף אִיּוֹב, שְׂאֵת מְשָׁלוֹ; וַיֹּאמַר.
כט,ב  מִי-יִתְּנֵנִי כְיַרְחֵי-קֶדֶם;    כִּימֵי, אֱלוֹהַּ יִשְׁמְרֵנִי.
כט,ג  בְּהִלּוֹ נֵרוֹ, עֲלֵי רֹאשִׁי;    לְאוֹרוֹ, אֵלֶךְ חֹשֶׁךְ.
כט,ד  כַּאֲשֶׁר הָיִיתִי, בִּימֵי חָרְפִּי;    בְּסוֹד אֱלוֹהַּ, עֲלֵי אָהֳלִי.
כט,ה  בְּעוֹד שַׁדַּי, עִמָּדִי;    סְבִיבוֹתַי נְעָרָי.
כט,ו  בִּרְחֹץ הֲלִיכַי בְּחֵמָה;    וְצוּר יָצוּק עִמָּדִי, פַּלְגֵי-שָׁמֶן.
כט,ז  בְּצֵאתִי שַׁעַר עֲלֵי-קָרֶת;    בָּרְחוֹב, אָכִין מוֹשָׁבִי.
כט,ח  רָאוּנִי נְעָרִים וְנֶחְבָּאוּ;    וִישִׁישִׁים, קָמוּ עָמָדוּ.
כט,ט  שָׂרִים, עָצְרוּ בְמִלִּים;    וְכַף, יָשִׂימוּ לְפִיהֶם.
כט,י  קוֹל-נְגִידִים נֶחְבָּאוּ;    וּלְשׁוֹנָם, לְחִכָּם דָּבֵקָה.
כט,יא  כִּי אֹזֶן שָׁמְעָה, וַתְּאַשְּׁרֵנִי;    וְעַיִן רָאֲתָה, וַתְּעִידֵנִי.
כט,יב  כִּי-אֲמַלֵּט, עָנִי מְשַׁוֵּעַ;    וְיָתוֹם, וְלֹא-עֹזֵר לוֹ.
כט,יג  בִּרְכַּת אֹבֵד, עָלַי תָּבֹא;    וְלֵב אַלְמָנָה אַרְנִן.
כט,יד  צֶדֶק לָבַשְׁתִּי, וַיִּלְבָּשֵׁנִי;    כִּמְעִיל וְצָנִיף, מִשְׁפָּטִי.
כט,טו  עֵינַיִם הָיִיתִי, לַעִוֵּר;    וְרַגְלַיִם לַפִּסֵּחַ אָנִי.
כט,טז  אָב אָנֹכִי, לָאֶבְיוֹנִים;    וְרִב לֹא-יָדַעְתִּי אֶחְקְרֵהוּ.
כט,יז  וָאֲשַׁבְּרָה, מְתַלְּעוֹת עַוָּל;    וּמִשִּׁנָּיו, אַשְׁלִיךְ טָרֶף.
כט,יח  וָאֹמַר, עִם-קִנִּי אֶגְוָע;    וְכַחוֹל, אַרְבֶּה יָמִים.
כט,יט  שָׁרְשִׁי פָתוּחַ אֱלֵי-מָיִם;    וְטַל, יָלִין בִּקְצִירִי.
כט,כ  כְּבוֹדִי, חָדָשׁ עִמָּדִי;    וְקַשְׁתִּי, בְּיָדִי תַחֲלִיף.
כט,כא  לִי-שָׁמְעוּ וְיִחֵלּוּ;    וְיִדְּמוּ, לְמוֹ עֲצָתִי.
כט,כב  אַחֲרֵי דְבָרִי, לֹא יִשְׁנוּ;    וְעָלֵימוֹ, תִּטֹּף מִלָּתִי.
כט,כג  וְיִחֲלוּ כַמָּטָר לִי;    וּפִיהֶם, פָּעֲרוּ לְמַלְקוֹשׁ.
כט,כד  אֶשְׂחַק אֲלֵהֶם, לֹא יַאֲמִינוּ;    וְאוֹר פָּנַי, לֹא יַפִּילוּן.
כט,כה  אֶבְחַר דַּרְכָּם,    וְאֵשֵׁב רֹאשׁ:
וְאֶשְׁכּוֹן, כְּמֶלֶךְ בַּגְּדוּד;    כַּאֲשֶׁר אֲבֵלִים יְנַחֵם.
ל,א  וְעַתָּה, שָׂחֲקוּ עָלַי--    צְעִירִים מִמֶּנִּי, לְיָמִים:
אֲשֶׁר-מָאַסְתִּי אֲבוֹתָם--    לָשִׁית, עִם-כַּלְבֵי צֹאנִי.
ל,ב  גַּם-כֹּחַ יְדֵיהֶם, לָמָּה לִּי;    עָלֵימוֹ, אָבַד כָּלַח.
ל,ג  בְּחֶסֶר וּבְכָפָן, גַּלְמוּד:    הַעֹרְקִים צִיָּה--אֶמֶשׁ, שׁוֹאָה וּמְשֹׁאָה.
ל,ד  הַקֹּטְפִים מַלּוּחַ עֲלֵי-שִׂיחַ;    וְשֹׁרֶשׁ רְתָמִים לַחְמָם.
ל,ה  מִן-גֵּו יְגֹרָשׁוּ;    יָרִיעוּ עָלֵימוֹ, כַּגַּנָּב.
ל,ו  בַּעֲרוּץ נְחָלִים לִשְׁכֹּן;    חֹרֵי עָפָר וְכֵפִים.
ל,ז  בֵּין-שִׂיחִים יִנְהָקוּ;    תַּחַת חָרוּל יְסֻפָּחוּ.
ל,ח  בְּנֵי-נָבָל, גַּם-בְּנֵי בְלִי-שֵׁם--    נִכְּאוּ, מִן-הָאָרֶץ.
ל,ט  וְעַתָּה, נְגִינָתָם הָיִיתִי;    וָאֱהִי לָהֶם לְמִלָּה.
ל,י  תִּעֲבוּנִי, רָחֲקוּ מֶנִּי;    וּמִפָּנַי, לֹא-חָשְׂכוּ רֹק.
ל,יא  כִּי-יתרו (יִתְרִי) פִתַּח, וַיְעַנֵּנִי;    וְרֶסֶן, מִפָּנַי שִׁלֵּחוּ.
ל,יב  עַל-יָמִין, פִּרְחַח יָקוּמוּ:    רַגְלַי שִׁלֵּחוּ; וַיָּסֹלּוּ עָלַי, אָרְחוֹת אֵידָם.
ל,יג  נָתְסוּ, נְתִיבָתִי:    לְהַוָּתִי יֹעִילוּ; לֹא עֹזֵר לָמוֹ.
ל,יד  כְּפֶרֶץ רָחָב יֶאֱתָיוּ;    תַּחַת שֹׁאָה, הִתְגַּלְגָּלוּ.
ל,טו  הָהְפַּךְ עָלַי,    בַּלָּהוֹת:
תִּרְדֹּף כָּרוּחַ, נְדִבָתִי;    וּכְעָב, עָבְרָה יְשֻׁעָתִי.
ל,טז  וְעַתָּה--עָלַי, תִּשְׁתַּפֵּךְ נַפְשִׁי;    יֹאחֲזוּנִי יְמֵי-עֹנִי.
ל,יז  לַיְלָה--עֲצָמַי, נִקַּר מֵעָלָי;    וְעֹרְקַי, לֹא יִשְׁכָּבוּן.
ל,יח  בְּרָב-כֹּחַ, יִתְחַפֵּשׂ לְבוּשִׁי;    כְּפִי כֻתָּנְתִּי יַאַזְרֵנִי.
ל,יט  הֹרָנִי לַחֹמֶר;    וָאֶתְמַשֵּׁל, כֶּעָפָר וָאֵפֶר.
ל,כ  אֲשַׁוַּע אֵלֶיךָ, וְלֹא תַעֲנֵנִי;    עָמַדְתִּי, וַתִּתְבֹּנֶן בִּי.
ל,כא  תֵּהָפֵךְ לְאַכְזָר לִי;    בְּעֹצֶם יָדְךָ תִשְׂטְמֵנִי.
ל,כב  תִּשָּׂאֵנִי אֶל-רוּחַ, תַּרְכִּיבֵנִי;    וּתְמֹגְגֵנִי, תשוה (תֻּשִׁיָּה).
ל,כג  כִּי-יָדַעְתִּי, מָוֶת תְּשִׁיבֵנִי;    וּבֵית מוֹעֵד לְכָל-חָי.
ל,כד  אַךְ לֹא-בְעִי, יִשְׁלַח-יָד;    אִם-בְּפִידוֹ, לָהֶן שׁוּעַ.
ל,כה  אִם-לֹא בָכִיתִי, לִקְשֵׁה-יוֹם;    עָגְמָה נַפְשִׁי, לָאֶבְיוֹן.
ל,כו  כִּי טוֹב קִוִּיתִי, וַיָּבֹא רָע;    וַאֲיַחֲלָה לְאוֹר, וַיָּבֹא אֹפֶל.
ל,כז  מֵעַי רֻתְּחוּ וְלֹא-דָמּוּ;    קִדְּמֻנִי יְמֵי-עֹנִי.
ל,כח  קֹדֵר הִלַּכְתִּי, בְּלֹא חַמָּה;    קַמְתִּי בַקָּהָל אֲשַׁוֵּעַ.
ל,כט  אָח, הָיִיתִי לְתַנִּים;    וְרֵעַ, לִבְנוֹת יַעֲנָה.
ל,ל  עוֹרִי, שָׁחַר מֵעָלָי;    וְעַצְמִי-חָרָה, מִנִּי-חֹרֶב.
ל,לא  וַיְהִי לְאֵבֶל, כִּנֹּרִי;    וְעֻגָבִי, לְקוֹל בֹּכִים.
לא,א  בְּרִית, כָּרַתִּי לְעֵינָי;    וּמָה אֶתְבּוֹנֵן, עַל-בְּתוּלָה.
לא,ב  וּמֶה, חֵלֶק אֱלוֹהַּ מִמָּעַל;    וְנַחֲלַת שַׁדַּי, מִמְּרֹמִים.
לא,ג  הֲלֹא-אֵיד לְעַוָּל;    וְנֵכֶר, לְפֹעֲלֵי אָוֶן.
לא,ד  הֲלֹא-הוּא, יִרְאֶה דְרָכָי;    וְכָל-צְעָדַי יִסְפּוֹר.
לא,ה  אִם-הָלַכְתִּי עִם-שָׁוְא;    וַתַּחַשׁ עַל-מִרְמָה רַגְלִי.
לא,ו  יִשְׁקְלֵנִי בְמֹאזְנֵי-צֶדֶק;    וְיֵדַע אֱלוֹהַּ, תֻּמָּתִי.
לא,ז  אִם תִּטֶּה אַשֻּׁרִי,    מִנִּי הַדָּרֶךְ:
וְאַחַר עֵינַי, הָלַךְ לִבִּי;    וּבְכַפַּי, דָּבַק מאוּם.
לא,ח  אֶזְרְעָה, וְאַחֵר יֹאכֵל;    וְצֶאֱצָאַי יְשֹׁרָשׁוּ.
לא,ט  אִם-נִפְתָּה לִבִּי, עַל-אִשָּׁה;    וְעַל-פֶּתַח רֵעִי אָרָבְתִּי.
לא,י  תִּטְחַן לְאַחֵר אִשְׁתִּי;    וְעָלֶיהָ, יִכְרְעוּן אֲחֵרִין.
לא,יא  כִּי-הוא (הִיא) זִמָּה;    והיא (וְהוּא), עָו‍ֹן פְּלִילִים.
לא,יב  כִּי אֵשׁ הִיא, עַד-אֲבַדּוֹן תֹּאכֵל;    וּבְכָל-תְּבוּאָתִי תְשָׁרֵשׁ.
לא,יג  אִם-אֶמְאַס--מִשְׁפַּט עַבְדִּי, וַאֲמָתִי:    בְּרִבָם, עִמָּדִי.
לא,יד  וּמָה אֶעֱשֶׂה, כִּי-יָקוּם אֵל;    וְכִי-יִפְקֹד, מָה אֲשִׁיבֶנּוּ.
לא,טו  הֲלֹא-בַבֶּטֶן, עֹשֵׂנִי עָשָׂהוּ;    וַיְכֻנֶנּוּ, בָּרֶחֶם אֶחָד.
לא,טז  אִם-אֶמְנַע, מֵחֵפֶץ דַּלִּים;    וְעֵינֵי אַלְמָנָה אֲכַלֶּה.
לא,יז  וְאֹכַל פִּתִּי לְבַדִּי;    וְלֹא-אָכַל יָתוֹם מִמֶּנָּה.
לא,יח  כִּי מִנְּעוּרַי, גְּדֵלַנִי כְאָב;    וּמִבֶּטֶן אִמִּי אַנְחֶנָּה.
לא,יט  אִם-אֶרְאֶה אוֹבֵד, מִבְּלִי לְבוּשׁ;    וְאֵין כְּסוּת, לָאֶבְיוֹן.
לא,כ  אִם-לֹא בֵרְכוּנִי חֲלָצָו;    וּמִגֵּז כְּבָשַׂי, יִתְחַמָּם.
לא,כא  אִם-הֲנִיפוֹתִי עַל-יָתוֹם יָדִי:    כִּי-אֶרְאֶה בַשַּׁעַר, עֶזְרָתִי.
לא,כב  כְּתֵפִי, מִשִּׁכְמָה תִפּוֹל;    וְאֶזְרֹעִי, מִקָּנָה תִשָּׁבֵר.
לא,כג  כִּי פַחַד אֵלַי, אֵיד אֵל;    וּמִשְּׂאֵתוֹ, לֹא אוּכָל.
לא,כד  אִם-שַׂמְתִּי זָהָב כִּסְלִי;    וְלַכֶּתֶם, אָמַרְתִּי מִבְטַחִי.
לא,כה  אִם-אֶשְׂמַח, כִּי-רַב חֵילִי;    וְכִי-כַבִּיר, מָצְאָה יָדִי.
לא,כו  אִם-אֶרְאֶה אוֹר, כִּי יָהֵל;    וְיָרֵחַ, יָקָר הֹלֵךְ.
לא,כז  וַיִּפְתְּ בַּסֵּתֶר לִבִּי;    וַתִּשַּׁק יָדִי לְפִי.
לא,כח  גַּם-הוּא, עָו‍ֹן פְּלִילִי:    כִּי-כִחַשְׁתִּי לָאֵל מִמָּעַל.
לא,כט  אִם-אֶשְׂמַח, בְּפִיד מְשַׂנְאִי;    וְהִתְעֹרַרְתִּי, כִּי-מְצָאוֹ רָע.
לא,ל  וְלֹא-נָתַתִּי לַחֲטֹא חִכִּי--    לִשְׁאֹל בְּאָלָה נַפְשׁוֹ.
לא,לא  אִם-לֹא אָמְרוּ, מְתֵי אָהֳלִי;    מִי-יִתֵּן מִבְּשָׂרוֹ, לֹא נִשְׂבָּע.
לא,לב  בַּחוּץ, לֹא-יָלִין גֵּר;    דְּלָתַי, לָאֹרַח אֶפְתָּח.
לא,לג  אִם-כִּסִּיתִי כְאָדָם פְּשָׁעָי--    לִטְמוֹן בְּחֻבִּי עֲו‍ֹנִי.
לא,לד  כִּי אֶעֱרוֹץ, הָמוֹן רַבָּה--    וּבוּז-מִשְׁפָּחוֹת יְחִתֵּנִי;
וָאֶדֹּם,    לֹא-אֵצֵא פָתַח.
לא,לה  מִי יִתֶּן-לִי, שֹׁמֵעַ לִי--    הֶן-תָּוִי, שַׁדַּי יַעֲנֵנִי;
וְסֵפֶר כָּתַב,    אִישׁ רִיבִי.
לא,לו  אִם-לֹא עַל-שִׁכְמִי, אֶשָּׂאֶנּוּ;    אֶעֶנְדֶנּוּ עֲטָרוֹת לִי.
לא,לז  מִסְפַּר צְעָדַי, אַגִּידֶנּוּ;    כְּמוֹ-נָגִיד, אֲקָרְבֶנּוּ.
לא,לח  אִם-עָלַי, אַדְמָתִי תִזְעָק;    וְיַחַד, תְּלָמֶיהָ יִבְכָּיוּן.
לא,לט  אִם-כֹּחָהּ, אָכַלְתִּי בְלִי-כָסֶף;    וְנֶפֶשׁ בְּעָלֶיהָ הִפָּחְתִּי.
לא,מ  תַּחַת חִטָּה, יֵצֵא חוֹחַ--וְתַחַת-שְׂעֹרָה בָאְשָׁה:    תַּמּוּ, דִּבְרֵי אִיּוֹב.

לב,א  וַיִּשְׁבְּתוּ, שְׁלֹשֶׁת הָאֲנָשִׁים הָאֵלֶּה--    מֵעֲנוֹת אֶת-אִיּוֹב:
כִּי הוּא צַדִּיק    בְּעֵינָיו.

לב,ב  וַיִּחַר אַף, אֱלִיהוּא בֶן-בַּרַכְאֵל הַבּוּזִי--    מִמִּשְׁפַּחַת-רָם:
בְּאִיּוֹב, חָרָה אַפּוֹ--    עַל-צַדְּקוֹ נַפְשׁוֹ, מֵאֱלֹהִים.
לב,ג  וּבִשְׁלֹשֶׁת רֵעָיו,    חָרָה אַפּוֹ:
עַל אֲשֶׁר לֹא-מָצְאוּ מַעֲנֶה--    וַיַּרְשִׁיעוּ, אֶת-אִיּוֹב.
לב,ד  וֶאֱלִיהוּ--חִכָּה אֶת-אִיּוֹב, בִּדְבָרִים:    כִּי זְקֵנִים-הֵמָּה מִמֶּנּוּ לְיָמִים.
לב,ה  וַיַּרְא אֱלִיהוּא--כִּי אֵין מַעֲנֶה, בְּפִי שְׁלֹשֶׁת הָאֲנָשִׁים;    וַיִּחַר אַפּוֹ.

לב,ו  וַיַּעַן, אֱלִיהוּא בֶן בַּרַכְאֵל הַבּוּזִי--    וַיֹּאמַר:
צָעִיר אֲנִי לְיָמִים,    וְאַתֶּם יְשִׁישִׁים;
עַל-כֵּן זָחַלְתִּי וָאִירָא,    מֵחַוֹּת דֵּעִי אֶתְכֶם.
לב,ז  אָמַרְתִּי, יָמִים יְדַבֵּרוּ;    וְרֹב שָׁנִים, יֹדִיעוּ חָכְמָה.
לב,ח  אָכֵן, רוּחַ-הִיא בֶאֱנוֹשׁ;    וְנִשְׁמַת שַׁדַּי תְּבִינֵם.
לב,ט  לֹא-רַבִּים יֶחְכָּמוּ;    וּזְקֵנִים, יָבִינוּ מִשְׁפָּט.
לב,י  לָכֵן אָמַרְתִּי, שִׁמְעָה-לִּי;    אֲחַוֶּה דֵעִי אַף-אָנִי.
לב,יא  הֵן הוֹחַלְתִּי, לְדִבְרֵיכֶם--אָזִין, עַד-תְּבוּנֹתֵיכֶם:    עַד-תַּחְקְרוּן מִלִּין.
לב,יב  וְעָדֵיכֶם, אֶתְבּוֹנָן:    וְהִנֵּה אֵין לְאִיּוֹב מוֹכִיחַ--עוֹנֶה אֲמָרָיו מִכֶּם.
לב,יג  פֶּן-תֹּאמְרוּ, מָצָאנוּ חָכְמָה;    אֵל יִדְּפֶנּוּ לֹא-אִישׁ.
לב,יד  וְלֹא-עָרַךְ אֵלַי מִלִּין;    וּבְאִמְרֵיכֶם, לֹא אֲשִׁיבֶנּוּ.
לב,טו  חַתּוּ, לֹא-עָנוּ עוֹד;    הֶעְתִּיקוּ מֵהֶם מִלִּים.
לב,טז  וְהוֹחַלְתִּי, כִּי-לֹא יְדַבֵּרוּ:    כִּי עָמְדוּ, לֹא-עָנוּ עוֹד.
לב,יז  אַעֲנֶה אַף-אֲנִי חֶלְקִי;    אֲחַוֶּה דֵעִי אַף-אָנִי.
לב,יח  כִּי, מָלֵתִי מִלִּים;    הֱצִיקַתְנִי, רוּחַ בִּטְנִי.
לב,יט  הִנֵּה-בִטְנִי--כְּיַיִן לֹא-יִפָּתֵחַ;    כְּאֹבוֹת חֲדָשִׁים, יִבָּקֵעַ.
לב,כ  אֲדַבְּרָה וְיִרְוַח-לִי;    אֶפְתַּח שְׂפָתַי וְאֶעֱנֶה.
לב,כא  אַל-נָא, אֶשָּׂא פְנֵי-אִישׁ;    וְאֶל-אָדָם, לֹא אֲכַנֶּה.
לב,כב  כִּי לֹא יָדַעְתִּי אֲכַנֶּה;    כִּמְעַט, יִשָּׂאֵנִי עֹשֵׂנִי.
לג,א  וְאוּלָם--שְׁמַע-נָא אִיּוֹב מִלָּי;    וְכָל-דְּבָרַי הַאֲזִינָה.
לג,ב  הִנֵּה-נָא, פָּתַחְתִּי פִי;    דִּבְּרָה לְשׁוֹנִי בְחִכִּי.
לג,ג  יֹשֶׁר-לִבִּי אֲמָרָי;    וְדַעַת שְׂפָתַי, בָּרוּר מִלֵּלוּ.
לג,ד  רוּחַ-אֵל עָשָׂתְנִי;    וְנִשְׁמַת שַׁדַּי תְּחַיֵּנִי.
לג,ה  אִם-תּוּכַל הֲשִׁיבֵנִי;    עֶרְכָה לְפָנַי, הִתְיַצָּבָה.
לג,ו  הֵן-אֲנִי כְפִיךָ לָאֵל;    מֵחֹמֶר, קֹרַצְתִּי גַם-אָנִי.
לג,ז  הִנֵּה אֵמָתִי, לֹא תְבַעֲתֶךָּ;    וְאַכְפִּי, עָלֶיךָ לֹא-יִכְבָּד.
לג,ח  אַךְ, אָמַרְתָּ בְאָזְנָי;    וְקוֹל מִלִּין אֶשְׁמָע.
לג,ט  זַךְ אֲנִי, בְּלִי-פָשַׁע:    חַף אָנֹכִי; וְלֹא עָו‍ֹן לִי.
לג,י  הֵן תְּנוּאוֹת, עָלַי יִמְצָא;    יַחְשְׁבֵנִי לְאוֹיֵב לוֹ.
לג,יא  יָשֵׂם בַּסַּד רַגְלָי;    יִשְׁמֹר, כָּל-אָרְחֹתָי.
לג,יב  הֶן-זֹאת לֹא-צָדַקְתָּ אֶעֱנֶךָּ:    כִּי-יִרְבֶּה אֱלוֹהַּ, מֵאֱנוֹשׁ.
לג,יג  מַדּוּעַ, אֵלָיו רִיבוֹתָ:    כִּי כָל-דְּבָרָיו, לֹא יַעֲנֶה.
לג,יד  כִּי-בְאַחַת יְדַבֶּר-אֵל;    וּבִשְׁתַּיִם, לֹא יְשׁוּרֶנָּה.
לג,טו  בַּחֲלוֹם, חֶזְיוֹן לַיְלָה--בִּנְפֹל תַּרְדֵּמָה, עַל-אֲנָשִׁים;    בִּתְנוּמוֹת, עֲלֵי מִשְׁכָּב.
לג,טז  אָז יִגְלֶה, אֹזֶן אֲנָשִׁים;    וּבְמֹסָרָם יַחְתֹּם.
לג,יז  לְהָסִיר, אָדָם מַעֲשֶׂה;    וְגֵוָה מִגֶּבֶר יְכַסֶּה.
לג,יח  יַחְשֹׂךְ נַפְשׁוֹ, מִנִּי-שָׁחַת;    וְחַיָּתוֹ, מֵעֲבֹר בַּשָּׁלַח.
לג,יט  וְהוּכַח בְּמַכְאוֹב, עַל-מִשְׁכָּבוֹ;    וריב (וְרוֹב) עֲצָמָיו אֵתָן.
לג,כ  וְזִהֲמַתּוּ חַיָּתוֹ לָחֶם;    וְנַפְשׁוֹ, מַאֲכַל תַּאֲוָה.
לג,כא  יִכֶל בְּשָׂרוֹ מֵרֹאִי;    ושפי (וְשֻׁפּוּ) עַצְמֹתָיו, לֹא רֻאּוּ.
לג,כב  וַתִּקְרַב לַשַּׁחַת נַפְשׁוֹ;    וְחַיָּתוֹ, לַמְמִתִים.
לג,כג  אִם-יֵשׁ עָלָיו, מַלְאָךְ--מֵלִיץ, אֶחָד מִנִּי-אָלֶף:    לְהַגִּיד לְאָדָם יָשְׁרוֹ.
לג,כד  וַיְחֻנֶּנּוּ--וַיֹּאמֶר, פְּדָעֵהוּ מֵרֶדֶת שָׁחַת;    מָצָאתִי כֹפֶר.
לג,כה  רֻטְפַשׁ בְּשָׂרוֹ מִנֹּעַר;    יָשׁוּב, לִימֵי עֲלוּמָיו.
לג,כו  יֶעְתַּר אֶל-אֱלוֹהַּ, וַיִּרְצֵהוּ,    וַיַּרְא פָּנָיו, בִּתְרוּעָה;
וַיָּשֶׁב לֶאֱנוֹשׁ,    צִדְקָתוֹ.
לג,כז  יָשֹׁר, עַל-אֲנָשִׁים, וַיֹּאמֶר, חָטָאתִי וְיָשָׁר הֶעֱוֵיתִי;    וְלֹא-שָׁוָה לִי.
לג,כח  פָּדָה נפשי (נַפְשׁוֹ), מֵעֲבֹר בַּשָּׁחַת;    וחיתי (וְחַיָּתוֹ), בָּאוֹר תִּרְאֶה.
לג,כט  הֶן-כָּל-אֵלֶּה, יִפְעַל-אֵל--    פַּעֲמַיִם שָׁלוֹשׁ עִם-גָּבֶר.
לג,ל  לְהָשִׁיב נַפְשׁוֹ, מִנִּי-שָׁחַת--    לֵאוֹר, בְּאוֹר הַחַיִּים.
לג,לא  הַקְשֵׁב אִיּוֹב שְׁמַע-לִי;    הַחֲרֵשׁ, וְאָנֹכִי אֲדַבֵּר.
לג,לב  אִם-יֵשׁ-מִלִּין הֲשִׁיבֵנִי;    דַּבֵּר, כִּי-חָפַצְתִּי צַדְּקֶךָּ.
לג,לג  אִם-אַיִן, אַתָּה שְׁמַע-לִי;    הַחֲרֵשׁ, וַאֲאַלֶּפְךָ חָכְמָה.
לד,א                  וַיַּעַן אֱלִיהוּא, וַיֹּאמַר.
לד,ב  שִׁמְעוּ חֲכָמִים מִלָּי;    וְיֹדְעִים, הַאֲזִינוּ לִי.
לד,ג  כִּי-אֹזֶן, מִלִּין תִּבְחָן;    וְחֵךְ, יִטְעַם לֶאֱכֹל.
לד,ד  מִשְׁפָּט נִבְחֲרָה-לָּנוּ;    נֵדְעָה בֵינֵינוּ מַה-טּוֹב.
לד,ה  כִּי-אָמַר אִיּוֹב צָדַקְתִּי;    וְאֵל, הֵסִיר מִשְׁפָּטִי.
לד,ו  עַל-מִשְׁפָּטִי אֲכַזֵּב;    אָנוּשׁ חִצִּי בְלִי-פָשַׁע.
לד,ז  מִי-גֶבֶר כְּאִיּוֹב;    יִשְׁתֶּה-לַּעַג כַּמָּיִם.
לד,ח  וְאָרַח לְחֶבְרָה, עִם-פֹּעֲלֵי אָוֶן;    וְלָלֶכֶת, עִם-אַנְשֵׁי-רֶשַׁע.
לד,ט  כִּי-אָמַר, לֹא יִסְכָּן-גָּבֶר--    בִּרְצֹתוֹ, עִם-אֱלֹהִים.
לד,י  לָכֵן, אַנְשֵׁי לֵבָב--    שִׁמְעוּ-לִי:
חָלִלָה לָאֵל מֵרֶשַׁע;    וְשַׁדַּי מֵעָוֶל.
לד,יא  כִּי פֹעַל אָדָם, יְשַׁלֶּם-לוֹ;    וּכְאֹרַח אִישׁ, יַמְצִאֶנּוּ.
לד,יב  אַף-אָמְנָם, אֵל לֹא-יַרְשִׁיעַ;    וְשַׁדַּי, לֹא-יְעַוֵּת מִשְׁפָּט.
לד,יג  מִי-פָקַד עָלָיו אָרְצָה;    וּמִי שָׂם, תֵּבֵל כֻּלָּהּ.
לד,יד  אִם-יָשִׂים אֵלָיו לִבּוֹ;    רוּחוֹ וְנִשְׁמָתוֹ, אֵלָיו יֶאֱסֹף.
לד,טו  יִגְוַע כָּל-בָּשָׂר יָחַד;    וְאָדָם, עַל-עָפָר יָשׁוּב.
לד,טז  וְאִם-בִּינָה, שִׁמְעָה-זֹּאת;    הַאֲזִינָה, לְקוֹל מִלָּי.
לד,יז  הַאַף שׂוֹנֵא מִשְׁפָּט יַחֲבוֹשׁ;    וְאִם-צַדִּיק כַּבִּיר תַּרְשִׁיעַ.
לד,יח  הַאֲמֹר לְמֶלֶךְ בְּלִיָּעַל--    רָשָׁע, אֶל-נְדִיבִים.
לד,יט  אֲשֶׁר לֹא-נָשָׂא, פְּנֵי שָׂרִים,    וְלֹא נִכַּר-שׁוֹעַ, לִפְנֵי-דָל:
כִּי-מַעֲשֵׂה יָדָיו    כֻּלָּם.
לד,כ  רֶגַע, יָמֻתוּ--    וַחֲצוֹת לָיְלָה:
יְגֹעֲשׁוּ עָם וְיַעֲבֹרוּ;    וְיָסִירוּ אַבִּיר, לֹא בְיָד.
לד,כא  כִּי-עֵינָיו, עַל-דַּרְכֵי-אִישׁ;    וְכָל-צְעָדָיו יִרְאֶה.
לד,כב  אֵין-חֹשֶׁךְ, וְאֵין צַלְמָוֶת--    לְהִסָּתֶר שָׁם, פֹּעֲלֵי אָוֶן.
לד,כג  כִּי לֹא עַל-אִישׁ, יָשִׂים עוֹד--    לַהֲלֹךְ אֶל-אֵל, בַּמִּשְׁפָּט.
לד,כד  יָרֹעַ כַּבִּירִים לֹא-חֵקֶר;    וַיַּעֲמֵד אֲחֵרִים תַּחְתָּם.
לד,כה  לָכֵן--יַכִּיר, מַעְבָּדֵיהֶם;    וְהָפַךְ לַיְלָה, וְיִדַּכָּאוּ.
לד,כו  תַּחַת-רְשָׁעִים סְפָקָם--    בִּמְקוֹם רֹאִים.
לד,כז  אֲשֶׁר עַל-כֵּן, סָרוּ מֵאַחֲרָיו;    וְכָל-דְּרָכָיו, לֹא הִשְׂכִּילוּ.
לד,כח  לְהָבִיא עָלָיו, צַעֲקַת-דָּל;    וְצַעֲקַת עֲנִיִּים יִשְׁמָע.
לד,כט  וְהוּא יַשְׁקִט, וּמִי יַרְשִׁעַ--    וְיַסְתֵּר פָּנִים, וּמִי יְשׁוּרֶנּוּ;
וְעַל-גּוֹי וְעַל-אָדָם    יָחַד.
לד,ל  מִמְּלֹךְ, אָדָם חָנֵף--    מִמֹּקְשֵׁי עָם.
לד,לא  כִּי-אֶל-אֵל, הֶאָמַר נָשָׂאתִי--    לֹא אֶחְבֹּל.
לד,לב  בִּלְעֲדֵי אֶחֱזֶה, אַתָּה הֹרֵנִי;    אִם-עָוֶל פָּעַלְתִּי, לֹא אֹסִיף.
לד,לג  הֲמֵעִמְּךָ יְשַׁלְּמֶנָּה, כִּי-מָאַסְתָּ--כִּי-אַתָּה תִבְחַר וְלֹא-אָנִי;    וּמַה-יָּדַעְתָּ דַבֵּר.
לד,לד  אַנְשֵׁי לֵבָב, יֹאמְרוּ לִי;    וְגֶבֶר חָכָם, שֹׁמֵעַ לִי.
לד,לה  אִיּוֹב, לֹא-בְדַעַת יְדַבֵּר;    וּדְבָרָיו, לֹא בְהַשְׂכֵּיל.
לד,לו  אָבִי--יִבָּחֵן אִיּוֹב עַד-נֶצַח:    עַל-תְּשֻׁבֹת, בְּאַנְשֵׁי-אָוֶן.
לד,לז  כִּי יֹסִיף עַל-חַטָּאתוֹ פֶשַׁע, בֵּינֵינוּ יִשְׂפּוֹק;    וְיֶרֶב אֲמָרָיו לָאֵל.
לה,א                  וַיַּעַן אֱלִיהוּ, וַיֹּאמַר.
לה,ב  הֲזֹאת, חָשַׁבְתָּ לְמִשְׁפָּט;    אָמַרְתָּ, צִדְקִי מֵאֵל.
לה,ג  כִּי-תֹאמַר, מַה-יִּסְכָּן-לָךְ;    מָה-אֹעִיל, מֵחַטָּאתִי.
לה,ד  אֲנִי, אֲשִׁיבְךָ מִלִּין--    וְאֶת-רֵעֶיךָ עִמָּךְ.
לה,ה  הַבֵּט שָׁמַיִם וּרְאֵה;    וְשׁוּר שְׁחָקִים, גָּבְהוּ מִמֶּךָּ.
לה,ו  אִם-חָטָאתָ, מַה-תִּפְעָל-בּוֹ;    וְרַבּוּ פְשָׁעֶיךָ, מַה-תַּעֲשֶׂה-לּוֹ.
לה,ז  אִם-צָדַקְתָּ, מַה-תִּתֶּן-לוֹ;    אוֹ מַה-מִּיָּדְךָ יִקָּח.
לה,ח  לְאִישׁ-כָּמוֹךָ רִשְׁעֶךָ;    וּלְבֶן-אָדָם, צִדְקָתֶךָ.
לה,ט  מֵרֹב, עֲשׁוּקִים יַזְעִיקוּ;    יְשַׁוְּעוּ מִזְּרוֹעַ רַבִּים.
לה,י  וְלֹא-אָמַר--אַיֵּה, אֱלוֹהַּ עֹשָׂי:    נֹתֵן זְמִרוֹת בַּלָּיְלָה.
לה,יא  מַלְּפֵנוּ, מִבַּהֲמוֹת אָרֶץ;    וּמֵעוֹף הַשָּׁמַיִם יְחַכְּמֵנוּ.
לה,יב  שָׁם יִצְעֲקוּ, וְלֹא יַעֲנֶה--    מִפְּנֵי, גְּאוֹן רָעִים.
לה,יג  אַךְ-שָׁוְא, לֹא-יִשְׁמַע אֵל;    וְשַׁדַּי, לֹא יְשׁוּרֶנָּה.
לה,יד  אַף כִּי-תֹאמַר, לֹא תְשׁוּרֶנּוּ;    דִּין לְפָנָיו, וּתְחוֹלֵל לוֹ.
לה,טו  וְעַתָּה--כִּי-אַיִן, פָּקַד אַפּוֹ;    וְלֹא-יָדַע בַּפַּשׁ מְאֹד.
לה,טז  וְאִיּוֹב, הֶבֶל יִפְצֶה-פִּיהוּ;    בִּבְלִי-דַעַת, מִלִּין יַכְבִּר.
לו,א                  וַיֹּסֶף אֱלִיהוּא, וַיֹּאמַר.
לו,ב  כַּתַּר-לִי זְעֵיר, וַאֲחַוֶּךָּ:    כִּי עוֹד לֶאֱלוֹהַּ מִלִּים.
לו,ג  אֶשָּׂא דֵעִי, לְמֵרָחוֹק;    וְלְפֹעֲלִי, אֶתֵּן-צֶדֶק.
לו,ד  כִּי-אָמְנָם, לֹא-שֶׁקֶר מִלָּי;    תְּמִים דֵּעוֹת עִמָּךְ.
לו,ה  הֶן-אֵל כַּבִּיר, וְלֹא יִמְאָס:    כַּבִּיר, כֹּחַ לֵב.
לו,ו  לֹא-יְחַיֶּה רָשָׁע;    וּמִשְׁפַּט עֲנִיִּים יִתֵּן.
לו,ז  לֹא-יִגְרַע מִצַּדִּיק,    עֵינָיו:
וְאֶת-מְלָכִים לַכִּסֵּא;    וַיֹּשִׁיבֵם לָנֶצַח, וַיִּגְבָּהוּ.
לו,ח  וְאִם-אֲסוּרִים בַּזִּקִּים;    יִלָּכְדוּן, בְּחַבְלֵי-עֹנִי.
לו,ט  וַיַּגֵּד לָהֶם פָּעֳלָם;    וּפִשְׁעֵיהֶם, כִּי יִתְגַּבָּרוּ.
לו,י  וַיִּגֶל אָזְנָם, לַמּוּסָר;    וַיֹּאמֶר, כִּי-יְשׁוּבוּן מֵאָוֶן.
לו,יא  אִם-יִשְׁמְעוּ, וְיַעֲבֹדוּ:    יְכַלּוּ יְמֵיהֶם בַּטּוֹב; וּשְׁנֵיהֶם, בַּנְּעִימִים.
לו,יב  וְאִם-לֹא יִשְׁמְעוּ, בְּשֶׁלַח יַעֲבֹרוּ;    וְיִגְוְעוּ, בִּבְלִי-דָעַת.
לו,יג  וְחַנְפֵי-לֵב, יָשִׂימוּ אָף;    לֹא יְשַׁוְּעוּ, כִּי אֲסָרָם.
לו,יד  תָּמֹת בַּנֹּעַר נַפְשָׁם;    וְחַיָּתָם, בַּקְּדֵשִׁים.
לו,טו  יְחַלֵּץ עָנִי בְעָנְיוֹ;    וְיִגֶל בַּלַּחַץ אָזְנָם.
לו,טז  וְאַף הֲסִיתְךָ, מִפִּי-צָר--    רַחַב, לֹא-מוּצָק תַּחְתֶּיהָ;
וְנַחַת שֻׁלְחָנְךָ,    מָלֵא דָשֶׁן.
לו,יז  וְדִין-רָשָׁע מָלֵאתָ;    דִּין וּמִשְׁפָּט יִתְמֹכוּ.
לו,יח  כִּי-חֵמָה, פֶּן-יְסִיתְךָ בְסָפֶק;    וְרָב-כֹּפֶר, אַל-יַטֶּךָּ.
לו,יט  הֲיַעֲרֹךְ שׁוּעֲךָ, לֹא בְצָר;    וְכֹל, מַאֲמַצֵּי-כֹחַ.
לו,כ  אַל-תִּשְׁאַף הַלָּיְלָה--    לַעֲלוֹת עַמִּים תַּחְתָּם.
לו,כא  הִשָּׁמֶר, אַל-תֵּפֶן אֶל-אָוֶן:    כִּי-עַל-זֶה, בָּחַרְתָּ מֵעֹנִי.
לו,כב  הֶן-אֵל, יַשְׂגִּיב בְּכֹחוֹ;    מִי כָמֹהוּ מוֹרֶה.
לו,כג  מִי-פָקַד עָלָיו דַּרְכּוֹ;    וּמִי-אָמַר, פָּעַלְתָּ עַוְלָה.
לו,כד  זְכֹר, כִּי-תַשְׂגִּיא פָעֳלוֹ--    אֲשֶׁר שֹׁרְרוּ אֲנָשִׁים.
לו,כה  כָּל-אָדָם חָזוּ-בוֹ;    אֱנוֹשׁ, יַבִּיט מֵרָחוֹק.
לו,כו  הֶן-אֵל שַׂגִּיא, וְלֹא נֵדָע;    מִסְפַּר שָׁנָיו וְלֹא-חֵקֶר.
לו,כז  כִּי, יְגָרַע נִטְפֵי-מָיִם;    יָזֹקּוּ מָטָר לְאֵדוֹ.
לו,כח  אֲשֶׁר-יִזְּלוּ שְׁחָקִים;    יִרְעֲפוּ, עֲלֵי אָדָם רָב.
לו,כט  אַף אִם-יָבִין, מִפְרְשֵׂי-עָב;    תְּשֻׁאוֹת, סֻכָּתוֹ.
לו,ל  הֵן-פָּרַשׂ עָלָיו אוֹרוֹ;    וְשָׁרְשֵׁי הַיָּם כִּסָּה.
לו,לא  כִּי-בָם, יָדִין עַמִּים;    יִתֶּן-אֹכֶל לְמַכְבִּיר.
לו,לב  עַל-כַּפַּיִם כִּסָּה-אוֹר;    וַיְצַו עָלֶיהָ בְמַפְגִּיעַ.
לו,לג  יַגִּיד עָלָיו רֵעוֹ;    מִקְנֶה, אַף עַל-עוֹלֶה.
לז,א  אַף-לְזֹאת, יֶחֱרַד לִבִּי;    וְיִתַּר, מִמְּקוֹמוֹ.
לז,ב  שִׁמְעוּ שָׁמוֹעַ בְּרֹגֶז קֹלוֹ;    וְהֶגֶה, מִפִּיו יֵצֵא.
לז,ג  תַּחַת-כָּל-הַשָּׁמַיִם יִשְׁרֵהוּ;    וְאוֹרוֹ, עַל-כַּנְפוֹת הָאָרֶץ.
לז,ד  אַחֲרָיו, יִשְׁאַג-קוֹל--    יַרְעֵם, בְּקוֹל גְּאוֹנוֹ;
וְלֹא יְעַקְּבֵם,    כִּי-יִשָּׁמַע קוֹלוֹ.
לז,ה  יַרְעֵם אֵל בְּקוֹלוֹ, נִפְלָאוֹת;    עֹשֶׂה גְדֹלוֹת, וְלֹא נֵדָע.
לז,ו  כִּי לַשֶּׁלֶג, יֹאמַר--    הֱוֵא-אָרֶץ:
וְגֶשֶׁם מָטָר;    וְגֶשֶׁם, מִטְרוֹת עֻזּוֹ.
לז,ז  בְּיַד-כָּל-אָדָם יַחְתּוֹם--    לָדַעַת, כָּל-אַנְשֵׁי מַעֲשֵׂהוּ.
לז,ח  וַתָּבוֹא חַיָּה בְמוֹ-אָרֶב;    וּבִמְעוֹנֹתֶיהָ תִשְׁכֹּן.
לז,ט  מִן-הַחֶדֶר, תָּבוֹא סוּפָה;    וּמִמְּזָרִים קָרָה.
לז,י  מִנִּשְׁמַת-אֵל יִתֶּן-קָרַח;    וְרֹחַב מַיִם בְּמוּצָק.
לז,יא  אַף-בְּרִי, יַטְרִיחַ עָב;    יָפִיץ, עֲנַן אוֹרוֹ.
לז,יב  וְהוּא מְסִבּוֹת, מִתְהַפֵּךְ בְּתַחְבּוּלֹתָו    לְפָעֳלָם:
כֹּל אֲשֶׁר יְצַוֵּם,    עַל-פְּנֵי תֵבֵל אָרְצָה.
לז,יג  אִם-לְשֵׁבֶט אִם-לְאַרְצוֹ--    אִם-לְחֶסֶד, יַמְצִאֵהוּ.
לז,יד  הַאֲזִינָה זֹּאת אִיּוֹב;    עֲמֹד, וְהִתְבּוֹנֵן נִפְלְאוֹת אֵל.
לז,טו  הֲתֵדַע, בְּשׂוּם-אֱלוֹהַּ עֲלֵיהֶם;    וְהֹפִיעַ, אוֹר עֲנָנוֹ.
לז,טז  הֲתֵדַע, עַל-מִפְלְשֵׂי-עָב;    מִפְלְאוֹת, תְּמִים דֵּעִים.
לז,יז  אֲשֶׁר-בְּגָדֶיךָ חַמִּים--    בְּהַשְׁקִט אֶרֶץ, מִדָּרוֹם.
לז,יח  תַּרְקִיעַ עִמּוֹ, לִשְׁחָקִים;    חֲזָקִים, כִּרְאִי מוּצָק.
לז,יט  הוֹדִיעֵנוּ, מַה-נֹּאמַר לוֹ;    לֹא-נַעֲרֹךְ, מִפְּנֵי-חֹשֶׁךְ.
לז,כ  הַיְסֻפַּר-לוֹ, כִּי אֲדַבֵּר;    אִם-אָמַר אִישׁ, כִּי יְבֻלָּע.
לז,כא  וְעַתָּה, לֹא רָאוּ אוֹר--    בָּהִיר הוּא, בַּשְּׁחָקִים;
וְרוּחַ עָבְרָה,    וַתְּטַהֲרֵם.
לז,כב  מִצָּפוֹן, זָהָב יֶאֱתֶה;    עַל-אֱלוֹהַּ, נוֹרָא הוֹד.
לז,כג  שַׁדַּי לֹא-מְצָאנֻהוּ, שַׂגִּיא-כֹחַ;    וּמִשְׁפָּט וְרֹב-צְדָקָה, לֹא יְעַנֶּה.
לז,כד  לָכֵן, יְרֵאוּהוּ אֲנָשִׁים;    לֹא-יִרְאֶה, כָּל-חַכְמֵי-לֵב.

לח,א  וַיַּעַן-יְהוָה אֶת-אִיּוֹב, מנהסערה (מִן הַסְּעָרָה);    וַיֹּאמַר.
לח,ב  מִי זֶה, מַחְשִׁיךְ עֵצָה בְמִלִּין--    בְּלִי-דָעַת.
לח,ג  אֱזָר-נָא כְגֶבֶר חֲלָצֶיךָ;    וְאֶשְׁאָלְךָ, וְהוֹדִיעֵנִי.
לח,ד  אֵיפֹה הָיִיתָ, בְּיָסְדִי-אָרֶץ;    הַגֵּד, אִם-יָדַעְתָּ בִינָה.
לח,ה  מִי-שָׂם מְמַדֶּיהָ, כִּי תֵדָע;    אוֹ מִי-נָטָה עָלֶיהָ קָּו.
לח,ו  עַל-מָה, אֲדָנֶיהָ הָטְבָּעוּ;    אוֹ מִי-יָרָה, אֶבֶן פִּנָּתָהּ.
לח,ז  בְּרָן-יַחַד, כּוֹכְבֵי בֹקֶר;    וַיָּרִיעוּ, כָּל-בְּנֵי אֱלֹהִים.
לח,ח  וַיָּסֶךְ בִּדְלָתַיִם יָם;    בְּגִיחוֹ, מֵרֶחֶם יֵצֵא.
לח,ט  בְּשׂוּמִי עָנָן לְבֻשׁוֹ;    וַעֲרָפֶל, חֲתֻלָּתוֹ.
לח,י  וָאֶשְׁבֹּר עָלָיו חֻקִּי;    וָאָשִׂים, בְּרִיחַ וּדְלָתָיִם.
לח,יא  וָאֹמַר--עַד-פֹּה תָבוֹא, וְלֹא תֹסִיף;    וּפֹא-יָשִׁית, בִּגְאוֹן גַּלֶּיךָ.
לח,יב  הֲמִיָּמֶיךָ, צִוִּיתָ בֹּקֶר;    ידעתה שחר (יִדַּעְתָּ הַשַּׁחַר) מְקֹמוֹ.
לח,יג  לֶאֱחֹז, בְּכַנְפוֹת הָאָרֶץ;    וְיִנָּעֲרוּ רְשָׁ^עִים מִמֶּנָּה.
לח,יד  תִּתְהַפֵּךְ, כְּחֹמֶר חוֹתָם;    וְיִתְיַצְּבוּ, כְּמוֹ לְבוּשׁ.
לח,טו  וְיִמָּנַע מֵרְשָׁ^עִים אוֹרָם;    וּזְרוֹעַ רָמָה, תִּשָּׁבֵר.
לח,טז  הֲבָאתָ, עַד-נִבְכֵי-יָם;    וּבְחֵקֶר תְּהוֹם, הִתְהַלָּכְתָּ.
לח,יז  הֲנִגְלוּ לְךָ, שַׁעֲרֵי-מָוֶת;    וְשַׁעֲרֵי צַלְמָוֶת תִּרְאֶה.
לח,יח  הִתְבֹּנַנְתָּ, עַד-רַחֲבֵי-אָרֶץ;    הַגֵּד, אִם-יָדַעְתָּ כֻלָּהּ.
לח,יט  אֵי-זֶה הַדֶּרֶךְ, יִשְׁכָּן-אוֹר;    וְחֹשֶׁךְ, אֵי-זֶה מְקֹמוֹ.
לח,כ  כִּי תִקָּחֶנּוּ אֶל-גְּבוּלוֹ;    וְכִי-תָבִין, נְתִיבוֹת בֵּיתוֹ.
לח,כא  יָדַעְתָּ, כִּי-אָז תִּוָּלֵד;    וּמִסְפַּר יָמֶיךָ רַבִּים.
לח,כב  הֲבָאתָ, אֶל-אֹצְרוֹת שָׁלֶג;    וְאוֹצְרוֹת בָּרָד תִּרְאֶה.
לח,כג  אֲשֶׁר-חָשַׂכְתִּי לְעֶת-צָר;    לְיוֹם קְרָב, וּמִלְחָמָה.
לח,כד  אֵי-זֶה הַדֶּרֶךְ, יֵחָלֶק אוֹר;    יָפֵץ קָדִים עֲלֵי-אָרֶץ.
לח,כה  מִי-פִלַּג לַשֶּׁטֶף תְּעָלָה;    וְדֶרֶךְ, לַחֲזִיז קֹלוֹת.
לח,כו  לְהַמְטִיר, עַל-אֶרֶץ לֹא-אִישׁ--    מִדְבָּר, לֹא-אָדָם בּוֹ.
לח,כז  לְהַשְׂבִּיעַ שֹׁאָה, וּמְשֹׁאָה;    וּלְהַצְמִיחַ, מֹצָא דֶשֶׁא.
לח,כח  הֲיֵשׁ-לַמָּטָר אָב;    אוֹ מִי-הוֹלִיד, אֶגְלֵי-טָל.
לח,כט  מִבֶּטֶן מִי, יָצָא הַקָּרַח;    וּכְפֹר שָׁמַיִם, מִי יְלָדוֹ.
לח,ל  כָּאֶבֶן, מַיִם יִתְחַבָּאוּ;    וּפְנֵי תְהוֹם, יִתְלַכָּדוּ.
לח,לא  הַתְקַשֵּׁר, מַעֲדַנּוֹת כִּימָה;    אוֹ-מֹשְׁכוֹת כְּסִיל תְּפַתֵּחַ.
לח,לב  הֲתֹצִיא מַזָּרוֹת בְּעִתּוֹ;    וְעַיִשׁ, עַל-בָּנֶיהָ תַנְחֵם.
לח,לג  הֲיָדַעְתָּ, חֻקּוֹת שָׁמָיִם;    אִם-תָּשִׂים מִשְׁטָרוֹ בָאָרֶץ.
לח,לד  הֲתָרִים לָעָב קוֹלֶךָ;    וְשִׁפְעַת-מַיִם תְּכַסֶּךָּ.
לח,לה  הַתְשַׁלַּח בְּרָקִים וְיֵלֵכוּ;    וְיֹאמְרוּ לְךָ הִנֵּנוּ.
לח,לו  מִי-שָׁת, בַּטֻּחוֹת חָכְמָה;    אוֹ מִי-נָתַן לַשֶּׂכְוִי בִינָה.
לח,לז  מִי-יְסַפֵּר שְׁחָקִים בְּחָכְמָה;    וְנִבְלֵי שָׁמַיִם, מִי יַשְׁכִּיב.
לח,לח  בְּצֶקֶת עָפָר, לַמּוּצָק;    וּרְגָבִים יְדֻבָּקוּ.
לח,לט  הֲתָצוּד לְלָבִיא טָרֶף;    וְחַיַּת כְּפִירִים תְּמַלֵּא.
לח,מ  כִּי-יָשֹׁחוּ בַמְּעוֹנוֹת;    יֵשְׁבוּ בַסֻּכָּה לְמוֹ-אָרֶב.
לח,מא  מִי יָכִין לָעֹרֵב,    צֵידוֹ:
כִּי-יְלָדָו, אֶל-אֵל יְשַׁוֵּעוּ;    יִתְעוּ, לִבְלִי-אֹכֶל.
לט,א  הֲיָדַעְתָּ--עֵת, לֶדֶת יַעֲלֵי-סָלַע;    חֹלֵל אַיָּלוֹת תִּשְׁמֹר.
לט,ב  תִּסְפֹּר יְרָחִים תְּמַלֶּאנָה;    וְיָדַעְתָּ, עֵת לִדְתָּנָה.
לט,ג  תִּכְרַעְנָה, יַלְדֵיהֶן תְּפַלַּחְנָה;    חֶבְלֵיהֶם תְּשַׁלַּחְנָה.
לט,ד  יַחְלְמוּ בְנֵיהֶם, יִרְבּוּ בַבָּר;    יָצְאוּ, וְלֹא-שָׁבוּ לָמוֹ.
לט,ה  מִי-שִׁלַּח פֶּרֶא חָפְשִׁי;    וּמֹסְרוֹת עָרוֹד, מִי פִתֵּחַ.
לט,ו  אֲשֶׁר-שַׂמְתִּי עֲרָבָה בֵיתוֹ;    וּמִשְׁכְּנוֹתָיו מְלֵחָה.
לט,ז  יִשְׂחַק, לַהֲמוֹן קִרְיָה;    תְּשֻׁאוֹת נֹגֵשׂ, לֹא יִשְׁמָע.
לט,ח  יְתוּר הָרִים מִרְעֵהוּ;    וְאַחַר כָּל-יָרוֹק יִדְרוֹשׁ.
לט,ט  הֲיֹאבֶה רֵּים עָבְדֶךָ;    אִם-יָלִין, עַל-אֲבוּסֶךָ.
לט,י  הֲתִקְשָׁר-רֵים, בְּתֶלֶם עֲבֹתוֹ;    אִם-יְשַׂדֵּד עֲמָקִים אַחֲרֶיךָ.
לט,יא  הֲתִבְטַח-בּוֹ, כִּי-רַב כֹּחוֹ;    וְתַעֲזֹב אֵלָיו יְגִיעֶךָ.
לט,יב  הֲתַאֲמִין בּוֹ, כִּי-ישוב (יָשִׁיב) זַרְעֶךָ;    וְגָרְנְךָ יֶאֱסֹף.
לט,יג  כְּנַף-רְנָנִים נֶעֱלָסָה;    אִם-אֶבְרָה, חֲסִידָה וְנֹצָה.
לט,יד  כִּי-תַעֲזֹב לָאָרֶץ בֵּצֶיהָ;    וְעַל-עָפָר תְּחַמֵּם.
לט,טו  וַתִּשְׁכַּח, כִּי-רֶגֶל תְּזוּרֶהָ;    וְחַיַּת הַשָּׂדֶה תְדוּשֶׁהָ.
לט,טז  הִקְשִׁיחַ בָּנֶיהָ לְּלֹא-לָהּ;    לְרִיק יְגִיעָהּ בְּלִי-פָחַד.
לט,יז  כִּי-הִשָּׁהּ אֱלוֹהַּ חָכְמָה;    וְלֹא-חָלַק לָהּ, בַּבִּינָה.
לט,יח  כָּעֵת, בַּמָּרוֹם תַּמְרִיא;    תִּשְׂחַק לַסּוּס, וּלְרֹכְבוֹ.

לט,יט  הֲתִתֵּן לַסּוּס גְּבוּרָה;    הֲתַלְבִּישׁ צַוָּארוֹ רַעְמָה.
לט,כ  הֲתַרְעִישֶׁנּוּ, כָּאַרְבֶּה;    הוֹד נַחְרוֹ אֵימָה.
לט,כא  יַחְפְּרוּ בָעֵמֶק, וְיָשִׂישׂ בְּכֹחַ;    יֵצֵא, לִקְרַאת-נָשֶׁק.
לט,כב  יִשְׂחַק לְפַחַד, וְלֹא יֵחָת;    וְלֹא-יָשׁוּב, מִפְּנֵי-חָרֶב.
לט,כג  עָלָיו, תִּרְנֶה אַשְׁפָּה;    לַהַב חֲנִית וְכִידוֹן.
לט,כד  בְּרַעַשׁ וְרֹגֶז, יְגַמֶּא-אָרֶץ;    וְלֹא-יַאֲמִין, כִּי-קוֹל שׁוֹפָר.
לט,כה  בְּדֵי שֹׁפָר, יֹאמַר הֶאָח--    וּמֵרָחוֹק, יָרִיחַ מִלְחָמָה;
רַעַם שָׂרִים,    וּתְרוּעָה.
לט,כו  הֲמִבִּינָתְךָ, יַאֲבֶר-נֵץ;    יִפְרֹשׂ כְּנָפָו לְתֵימָן.
לט,כז  אִם-עַל-פִּיךָ, יַגְבִּיהַּ נָשֶׁר;    וְכִי, יָרִים קִנּוֹ.
לט,כח  סֶלַע יִשְׁכֹּן, וְיִתְלֹנָן--    עַל שֶׁן-סֶלַע, וּמְצוּדָה.
לט,כט  מִשָּׁם חָפַר-אֹכֶל;    לְמֵרָחוֹק, עֵינָיו יַבִּיטוּ.
לט,ל  וְאֶפְרֹחָו יְעַלְעוּ-דָם;    וּבַאֲשֶׁר חֲלָלִים, שָׁם הוּא.
מ,א                  וַיַּעַן יְהוָה אֶת-אִיּוֹב; וַיֹּאמַר.
מ,ב  הֲרֹב, עִם-שַׁדַּי יִסּוֹר;    מוֹכִיחַ אֱלוֹהַּ יַעֲנֶנָּה.

מ,ג                  וַיַּעַן אִיּוֹב אֶת-יְהוָה; וַיֹּאמַר.
מ,ד  הֵן קַלֹּתִי, מָה אֲשִׁיבֶךָּ;    יָדִי, שַׂמְתִּי לְמוֹ-פִי.
מ,ה  אַחַת דִּבַּרְתִּי, וְלֹא אֶעֱנֶה;    וּשְׁתַּיִם, וְלֹא אוֹסִיף.

מ,ו  וַיַּעַן-יְהוָה אֶת-אִיּוֹב, מנסערה (מִן סְעָרָה);    וַיֹּאמַר.
מ,ז  אֱזָר-נָא כְגֶבֶר חֲלָצֶיךָ;    אֶשְׁאָלְךָ, וְהוֹדִיעֵנִי.
מ,ח  הַאַף, תָּפֵר מִשְׁפָּטִי;    תַּרְשִׁיעֵנִי, לְמַעַן תִּצְדָּק.
מ,ט  וְאִם-זְרוֹעַ כָּאֵל לָךְ;    וּבְקוֹל, כָּמֹהוּ תַרְעֵם.
מ,י  עֲדֵה נָא גָאוֹן וָגֹבַהּ;    וְהוֹד וְהָדָר תִּלְבָּשׁ.
מ,יא  הָפֵץ, עֶבְרוֹת אַפֶּךָ;    וּרְאֵה כָל-גֵּאֶה, וְהַשְׁפִּילֵהוּ.
מ,יב  רְאֵה כָל-גֵּאֶה, הַכְנִיעֵהוּ;    וַהֲדֹךְ רְשָׁעִים תַּחְתָּם.
מ,יג  טָמְנֵם בֶּעָפָר יָחַד;    פְּנֵיהֶם, חֲבֹשׁ בַּטָּמוּן.
מ,יד  וְגַם-אֲנִי אוֹדֶךָּ:    כִּי-תוֹשִׁעַ לְךָ יְמִינֶךָ.
מ,טו  הִנֵּה-נָא בְהֵמוֹת, אֲשֶׁר-עָשִׂיתִי עִמָּךְ;    חָצִיר, כַּבָּקָר יֹאכֵל.
מ,טז  הִנֵּה-נָא כֹחוֹ בְמָתְנָיו;    וְאוֹנוֹ, בִּשְׁרִירֵי בִטְנוֹ.
מ,יז  יַחְפֹּץ זְנָבוֹ כְמוֹ-אָרֶז;    גִּידֵי פַחֲדָו יְשֹׂרָגוּ.
מ,יח  עֲצָמָיו, אֲפִיקֵי נְחֻשָׁה;    גְּרָמָיו, כִּמְטִיל בַּרְזֶל.
מ,יט  הוּא, רֵאשִׁית דַּרְכֵי-אֵל;    הָעֹשׂוֹ, יַגֵּשׁ חַרְבּוֹ.
מ,כ  כִּי-בוּל, הָרִים יִשְׂאוּ-לוֹ;    וְכָל-חַיַּת הַשָּׂדֶה, יְשַׂחֲקוּ-שָׁם.
מ,כא  תַּחַת-צֶאֱלִים יִשְׁכָּב--    בְּסֵתֶר קָנֶה וּבִצָּה.
מ,כב  יְסֻכֻּהוּ צֶאֱלִים צִלְלוֹ;    יְסֻבּוּהוּ, עַרְבֵי-נָחַל.
מ,כג  הֵן יַעֲשֹׁק נָהָר, לֹא יַחְפּוֹז;    יִבְטַח, כִּי-יָגִיחַ יַרְדֵּן אֶל-פִּיהוּ.
מ,כד  בְּעֵינָיו יִקָּחֶנּוּ;    בְּמוֹקְשִׁים, יִנְקָב-אָף.
מ,כה  תִּמְשֹׁךְ לִוְיָתָן בְּחַכָּה;    וּבְחֶבֶל, תַּשְׁקִיעַ לְשֹׁנוֹ.
מ,כו  הֲתָשִׂים אַגְמֹן בְּאַפּוֹ;    וּבְחוֹחַ, תִּקֹּב לֶחֱיוֹ.
מ,כז  הֲיַרְבֶּה אֵלֶיךָ, תַּחֲנוּנִים;    אִם-יְדַבֵּר אֵלֶיךָ רַכּוֹת.
מ,כח  הֲיִכְרֹת בְּרִית עִמָּךְ;    תִּקָּחֶנּוּ, לְעֶבֶד עוֹלָם.
מ,כט  הַתְשַׂחֶק-בּוֹ, כַּצִּפּוֹר;    וְתִקְשְׁרֶנּוּ, לְנַעֲרוֹתֶיךָ.
מ,ל  יִכְרוּ עָלָיו, חַבָּרִים;    יֶחֱצוּהוּ, בֵּין כְּנַעֲנִים.
מ,לא  הַתְמַלֵּא בְשֻׂכּוֹת עוֹרוֹ;    וּבְצִלְצַל דָּגִים רֹאשׁוֹ.
מ,לב  שִׂים-עָלָיו כַּפֶּךָ;    זְכֹר מִלְחָמָה, אַל-תּוֹסַף.
מא,א  הֵן-תֹּחַלְתּוֹ נִכְזָבָה;    הֲגַם אֶל-מַרְאָיו יֻטָל.
מא,ב  לֹא-אַכְזָר, כִּי יְעוּרֶנּוּ;    וּמִי הוּא, לְפָנַי יִתְיַצָּב.
מא,ג  מִי הִקְדִּימַנִי, וַאֲשַׁלֵּם;    תַּחַת כָּל-הַשָּׁמַיִם לִי-הוּא.
מא,ד  לא- (לוֹ-) אַחֲרִישׁ בַּדָּיו;    וּדְבַר-גְּבוּרוֹת, וְחִין עֶרְכּוֹ.
מא,ה  מִי-גִלָּה, פְּנֵי לְבוּשׁוֹ;    בְּכֶפֶל רִסְנוֹ, מִי יָבוֹא.
מא,ו  דַּלְתֵי פָנָיו, מִי פִתֵּחַ;    סְבִיבוֹת שִׁנָּיו אֵימָה.
מא,ז  גַּאֲוָה, אֲפִיקֵי מָגִנִּים;    סָגוּר, חוֹתָם צָר.
מא,ח  אֶחָד בְּאֶחָד יִגַּשׁוּ;    וְרוּחַ, לֹא-יָבֹא בֵינֵיהֶם.
מא,ט  אִישׁ-בְּאָחִיהוּ יְדֻבָּקוּ;    יִתְלַכְּדוּ, וְלֹא יִתְפָּרָדוּ.
מא,י  עֲטִישֹׁתָיו, תָּהֶל אוֹר;    וְעֵינָיו, כְּעַפְעַפֵּי-שָׁחַר.
מא,יא  מִפִּיו, לַפִּידִים יַהֲלֹכוּ;    כִּידוֹדֵי אֵשׁ, יִתְמַלָּטוּ.
מא,יב  מִנְּחִירָיו, יֵצֵא עָשָׁן--    כְּדוּד נָפוּחַ וְאַגְמֹן.
מא,יג  נַפְשׁוֹ, גֶּחָלִים תְּלַהֵט;    וְלַהַב, מִפִּיו יֵצֵא.
מא,יד  בְּצַוָּארוֹ, יָלִין עֹז;    וּלְפָנָיו, תָּדוּץ דְּאָבָה.
מא,טו  מַפְּלֵי בְשָׂרוֹ דָבֵקוּ;    יָצוּק עָלָיו, בַּל-יִמּוֹט.
מא,טז  לִבּוֹ, יָצוּק כְּמוֹ-אָבֶן;    וְיָצוּק, כְּפֶלַח תַּחְתִּית.
מא,יז  מִשֵּׂתוֹ, יָגוּרוּ אֵלִים;    מִשְּׁבָרִים, יִתְחַטָּאוּ.
מא,יח  מַשִּׂיגֵהוּ חֶרֶב, בְּלִי תָקוּם;    חֲנִית מַסָּע וְשִׁרְיָה.
מא,יט  יַחְשֹׁב לְתֶבֶן בַּרְזֶל;    לְעֵץ רִקָּבוֹן נְחוּשָׁה.
מא,כ  לֹא-יַבְרִיחֶנּוּ בֶן-קָשֶׁת;    לְקַשׁ, נֶהְפְּכוּ-לוֹ אַבְנֵי-קָלַע.
מא,כא  כְּקַשׁ, נֶחְשְׁבוּ תוֹתָח;    וְיִשְׂחַק, לְרַעַשׁ כִּידוֹן.
מא,כב  תַּחְתָּיו, חַדּוּדֵי חָרֶשׂ;    יִרְפַּד חָרוּץ עֲלֵי-טִיט.
מא,כג  יַרְתִּיחַ כַּסִּיר מְצוּלָה;    יָם, יָשִׂים כַּמֶּרְקָחָה.
מא,כד  אַחֲרָיו, יָאִיר נָתִיב;    יַחְשֹׁב תְּהוֹם לְשֵׂיבָה.
מא,כה  אֵין-עַל-עָפָר מָשְׁלוֹ;    הֶעָשׂוּ, לִבְלִי-חָת.
מא,כו  אֵת-כָּל-גָּבֹהַּ יִרְאֶה;    הוּא, מֶלֶךְ עַל-כָּל-בְּנֵי-שָׁחַץ.

מב,א                  וַיַּעַן אִיּוֹב אֶת-יְהוָה; וַיֹּאמַר.
מב,ב  ידעת (יָדַעְתִּי), כִּי-כֹל תּוּכָל;    וְלֹא-יִבָּצֵר מִמְּךָ מְזִמָּה.
מב,ג  מִי זֶה, מַעְלִים עֵצָה--    בְּלִי-דָעַת:
לָכֵן הִגַּדְתִּי, וְלֹא אָבִין;    נִפְלָאוֹת מִמֶּנִּי, וְלֹא אֵדָע.
מב,ד  שְׁמַע-נָא, וְאָנֹכִי אֲדַבֵּר;    אֶשְׁאָלְךָ, וְהוֹדִיעֵנִי.
מב,ה  לְשֵׁמַע-אֹזֶן שְׁמַעְתִּיךָ;    וְעַתָּה, עֵינִי רָאָתְךָ.
מב,ו  עַל-כֵּן, אֶמְאַס וְנִחַמְתִּי--    עַל-עָפָר וָאֵפֶר.

מב,ז וַיְהִי, אַחַר דִּבֶּר יְהוָה אֶת הַדְּבָרִים הָאֵלֶּה--אֶל אִיּוֹב; וַיֹּאמֶר יְהוָה אֶל אֱלִיפַז הַתֵּימָנִי, חָרָה אַפִּי בְךָ וּבִשְׁנֵי רֵעֶיךָ--כִּי לֹא דִבַּרְתֶּם אֵלַי נְכוֹנָה, כְּעַבְדִּי אִיּוֹב.  מב,ח וְעַתָּה קְחוּ לָכֶם שִׁבְעָה פָרִים וְשִׁבְעָה אֵילִים וּלְכוּ אֶל עַבְדִּי אִיּוֹב, וְהַעֲלִיתֶם עוֹלָה בַּעַדְכֶם, וְאִיּוֹב עַבְדִּי, יִתְפַּלֵּל עֲלֵיכֶם:  כִּי אִם פָּנָיו אֶשָּׂא, לְבִלְתִּי עֲשׂוֹת עִמָּכֶם נְבָלָה--כִּי לֹא דִבַּרְתֶּם אֵלַי נְכוֹנָה, כְּעַבְדִּי אִיּוֹב.  מב,ט וַיֵּלְכוּ אֱלִיפַז הַתֵּימָנִי וּבִלְדַּד הַשּׁוּחִי, צֹפַר הַנַּעֲמָתִי, וַיַּעֲשׂוּ, כַּאֲשֶׁר דִּבֶּר אֲלֵיהֶם יְהוָה; וַיִּשָּׂא יְהוָה, אֶת פְּנֵי אִיּוֹב.  מב,י וַיהוָה, שָׁב אֶת שבית (שְׁבוּת) אִיּוֹב, בְּהִתְפַּלְלוֹ, בְּעַד רֵעֵהוּ; וַיֹּסֶף יְהוָה אֶת כָּל אֲשֶׁר לְאִיּוֹב, לְמִשְׁנֶה.  מב,יא וַיָּבֹאוּ אֵלָיו כָּל אֶחָיו וְכָל אַחְיֹתָיו וְכָל יֹדְעָיו לְפָנִים, וַיֹּאכְלוּ עִמּוֹ לֶחֶם בְּבֵיתוֹ, וַיָּנֻדוּ לוֹ וַיְנַחֲמוּ אֹתוֹ, עַל כָּל הָרָעָה אֲשֶׁר הֵבִיא יְהוָה עָלָיו; וַיִּתְּנוּ לוֹ, אִישׁ קְשִׂיטָה אֶחָת, וְאִישׁ, נֶזֶם זָהָב אֶחָד.  מב,יב וַיהוָה, בֵּרַךְ אֶת אַחֲרִית אִיּוֹב--מֵרֵאשִׁתוֹ; וַיְהִי לוֹ אַרְבָּעָה עָשָׂר אֶלֶף צֹאן, וְשֵׁשֶׁת אֲלָפִים גְּמַלִּים, וְאֶלֶף צֶמֶד בָּקָר, וְאֶלֶף אֲתוֹנוֹת.  מב,יג וַיְהִי לוֹ שִׁבְעָנָה בָנִים, וְשָׁלוֹשׁ בָּנוֹת.  מב,יד וַיִּקְרָא שֵׁם הָאַחַת יְמִימָה, וְשֵׁם הַשֵּׁנִית קְצִיעָה; וְשֵׁם הַשְּׁלִישִׁית, קֶרֶן הַפּוּךְ.  מב,טו וְלֹא נִמְצָא נָשִׁים יָפוֹת, כִּבְנוֹת אִיּוֹב--בְּכָל הָאָרֶץ; וַיִּתֵּן לָהֶם אֲבִיהֶם נַחֲלָה, בְּתוֹךְ אֲחֵיהֶם.  מב,טז וַיְחִי אִיּוֹב אַחֲרֵי זֹאת, מֵאָה וְאַרְבָּעִים שָׁנָה; וירא (וַיִּרְאֶה), אֶת בָּנָיו וְאֶת בְּנֵי בָנָיו--אַרְבָּעָה, דֹּרוֹת.  מב,יז וַיָּמָת אִיּוֹב, זָקֵן וּשְׂבַע יָמִים.  {ש}